उपप्रधानमन्त्रीसमेत रहेका सहरी विकास मन्त्री प्रकाशमान सिंहले जलवायु परिवर्तनकाे असरबाट नेपाल प्रभावित भएकाे भन्दै प्रकृतिमैत्री ढंगले विकास निर्माणकाे काम गर्नुपर्ने बताएका छन्।
सोलुखुम्बुको साेलुदुधकुण्ड नगरपालिकाकाे प्रशासनिक भवन आइतबार शिलान्यास गर्दै उनले प्रकृतिमैत्री प्रविधिकाे प्रयाेग गरेर विकास निर्माणकाे काम गर्नुपर्नेमा जाेड दिए।
‘विकास निर्माणकाे काम त गर्नुपर्छ तर विकास निर्माण प्रकृतिमैत्री हुनुपर्छ भन्ने हामीलाई घटनाक्रमले सिकाएकाे छ। अब त्यहीअनुसार विकास निर्माणकाे काम गर्नुपर्छ,´ उनले भने, ‘घर बनाउँदा, प्रशासनिक भवन बनाउँदा हाेस् वा विकास निर्माणकाे अरू काम गर्दा अब समय बमाेजिम हामी चल्नैपर्छ। गाउँठाउँलाई जाेगाउने हाे भने वातावरणलाई हामीले ध्यान दिनैपर्छ।’
उनले प्रशासकीय भवन निर्माण भएपछि पालिकाकाे सेवाप्रवाह प्रभावकारी हुने र नागरिकले सहज रूपमा सेवा पाउने विश्वास व्यक्त गरेका थिए।
उनले पर्यटकीय हिसाबले साेलुखुम्बु उत्कृष्ट गन्तव्य रहेकाे भन्दै ४० वर्ष अगाडि गणेशमान सिंहसँग साेलुखुम्बु आएकाे स्मरण पनि गरे।
४० वर्ष अगाडि र अहिले हेर्दा आफूले साेलुखुम्बुमा विकास निर्माणकाे हिसाबले धेरै परिवर्तन पाएकाे उनले बताए।
उपप्रधानमन्त्री सिंहले राजनीतिक स्थिरता र आर्थिक विकासका लागि अहिलेकाे सरकारले काम गरिरहेकाे भन्दै जनतालाई थप अधिकारसम्पन्न बनाउन संविधान संशाेधन गर्न लागेको बताए।
संविधान जारी गर्दाजस्तै सबै राजनीतिक दलहरूसँग छलफल गरेरै संविधान संशाेधनकाे प्रक्रिया अघि बढ्ने उनको भनाइ छ।
उपप्रधानमन्त्री सिंहले शिलान्यास गरेको प्रशासकीय भवन पालिकाकाे आन्तरिक स्राेतबाट दुई वर्षभित्रै बनाइसक्ने पालिकाका प्रमुख नाम्गेल जाङ्बु शेर्पाले बताए।
