नेकपा (माओवादी केन्द्र)को स्थायी कमिटी बैठक स्थगित भएको छ।
बिहीबार दिउँसो ३ बजेका लागि तय भएको बैठक स्थगित भएको माओवादी केन्द्रका उपाध्यक्षसमेत रहेका प्रवक्ता अग्नि सापकोटाले जानकारी दिए।
'अध्यक्षको कार्यव्यस्तताका कारण स्थगित भएको हो, भोलि बस्छ,' उनले भने।
बैठक भोलि बिहान ११ बजे बस्ने पनि सापकोटाले जानकारी दिए। बैठकमा पुस २ देखि सुरू हुने केन्द्रीय कमिटी बैठकका एजेन्डाबारे छलफल हुनेछ।
पार्टीनिकट विद्यार्थी संगठन अनेरास्ववियू (क्रान्तिकारी) को दुईपटक स्थगित भएको राष्ट्रिय सम्मेलनका विषयमा पनि छलफल हुने प्रवक्ता सापकोटाले जानकारी दिए।
विद्यार्थीहरूबीच विवाद र कुर्ची हानाहान भएपछि स्थगित भएको सम्मेलन मंसिरको २३ र २४ गते गर्ने भनिएको थियो। तर तयारी नपुगेको र निर्वाचनको मोडालिटी पनि टुंगो लगाउन बाँकी रहेकाले फेरि स्थगित भएको थियो।
'स्थगित भएको सम्मेलनबारे पनि आजको बैठकमा छलफल हुन्छ,' प्रवक्ता सापकोटाले भने।
बैठकमा पालिकाहरूमा गर्ने भनिएको खबरदारी सभा, पालिका सम्मेलन लगायतका विषयमा पनि छलफल हुनेछ।
त्यस्तै उपनिर्वाचनबारे पनि समीक्षा हुने प्रवक्ता सापकोटाले बताए।'यसअघि उपनिर्वाचनको परिणामबारे प्रारम्भिक छलफल भएको थियो। आज पुनः समीक्षा हुन्छ,' उनले भने।
माओवादी केन्द्रले पूर्वउपराष्ट्रपति नन्दबहादुर पुनलाई उपाध्यक्ष बनाउने तयारी गरेको छ। आगामी केन्द्रीय समितिको बैठकले अनुमोदन गर्ने तयारी छ। त्यसबारेमा पनि बिहीबारको स्थायी कमिटी बैठकमा छलफल गर्दैछ।
