नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' ले राष्ट्रिय स्वतन्त्र पार्टीका सभापति रवि लामिछानेलाई हाजिरी जमानीमा छाडिदिए पनि हुने बताएका छन्।
मंगलबार चितवनमा पार्टीले आयोजना गरेको खबरदारी सभामा बोल्दै प्रचण्डले देशको चौथो पार्टीको नेता भागेर विदेश जाने स्थिति नरहने पनि बताए।
‘मैले सरकार र सरकारवादी पार्टीका नेताहरूलाई भनेको छु, किन राख्नपर्यो हिरासतमा हाजिरी जमानीमा छोडिदिए भइहाल्यो नि!,’ प्रचण्डले भने, ‘जे जे जाँचबुझ गर्नुछ गरे हुन्छ नि। स्वयम रविले पनि अदालतको फैसला जेसुकै होस् मान्न तयार छु भनेपछि त्यो रवि लामिछानेसँग यति धेरै तर्सिनुपर्ने?’
कांग्रेस र एमाले कति कमजोर रहेछन् भन्ने प्रमाण रविसँग तर्सिएका कुराले देखाउने पनि उनले बताए। ‘एउटै मानिससँग उनीहरू कति आतंकित छन् भन्ने कुरा प्रमाण मात्र हो,’ उनले भने।
उनले यो तरिकाबाट कांग्रेस र एमालेको आयु नलम्बिने पनि बताए।
सरकारले रविमाथि अत्याचार गरिराखेमा संसदको विशेष अधिवेशन बोलाएर त्यहाँबाट नयाँ लडाइँ लड्ने पनि बताए।
उनले पालिकास्तरको खबरदारीबाट सरकार सच्चिएन भने विपक्षी र सत्तापक्षका केही मिलेर काठमाडौंमा विरोध प्रदर्शन गर्ने प्रचण्डको भनाइ छ।
आफूहरूले उठान गरेको जायज मागलाई सरकारले सम्बोधन गर्नुपर्ने उनको भनाइ छ।
