राष्ट्रिय स्वतन्त्र पार्टी (रास्वपा) कार्यकर्ताले पोखराका सहकारी पीडितलाई धम्क्याउन थालेको पीडितहरुले आरोप लगाएका छन्।
सुर्यदर्शन बचत तथा ऋण सहकारी संस्थाका पीडितले बुधबार प्रेस विज्ञप्ती जारी गर्दै रास्वपा नेता तथा कार्यकर्ताले पीडितको घरमै पुगेर धम्क्याउने, प्र्रलोपनमा पार्ने र भड्काउने जस्ता गतिविधी गरेको आरोप लगाएका हुन्।
पार्टी सभापति रवि लामिछाने सहकारी ठगी र संगठित अपराधमा मुछिएपछि रास्वपा कार्यकर्ताले पोखरामा दिनहुँ आन्दोलन गर्दै आएका छन्। उनीहरुले आन्दोलनमा पोखरेली नागरिक सहभागी नभएको भन्दै घरदैलो गरिरहेका छन्। घरदैलोका क्रममा रास्वपा कार्यकर्ताले पीडितलाई झन् पीडा दिने काम गरेको पीडितहरुले बताएका छन्।
‘अनुसन्धानलाई नै प्रभाव पार्ने किसिमको कार्यक्रम पोखरामा दिनहुँ जसो भइरहेका छन्, पार्टीका कार्यकर्ताद्धारा पीडित लखेटिएका छन्। पिटिएका छन्। विगत २ बर्षदेखि यो पार्टी सरकारमा हुँदा र नहुँदा पार्टीका नेताहरुलाई हारगुहार गर्दा, कैयन् पटक ज्ञापन पत्र बुझाउँदा पीडितको समस्या समाधानका निम्ति बिन्ति बिसाउँदा पनि कहिल्यै कुनै सरसहयोग भएन। आज पार्टी सभापति नै अनुसन्धानको दायरामा आउँदा झोलामा पीडितको पैसा बोकी फिर्ता दिने हो कि जस्तो गरे,’ विज्ञप्तीमा भनिएको छ।
रास्वपा सभापति एवं पूर्व उपप्रधान तथा गृहमन्त्री रवि लामिछाने सहकारी ठगी एवं संगठित अपराध मुद्धामा अहिले कास्की प्रहरीको हिरासतमा छन्। रास्वपा कार्यकर्ता भने लामिछानेको रिहाइको माग गर्दै दिनहुँ सडक आन्दोलनमा छन्।
अदालती प्रक्रियालाई प्रभावित पार्ने गरी रास्वपा कार्यकर्ताले आन्दोलन नरोकेको भन्दै सहकारी पीडितले विहिबार विशाल प्रदर्शन गर्ने तयारी गरेको छ।
विज्ञप्तीमा सहकारी पीडितका पक्षमा रहेका बौद्धिक जगत, व्यवसायी, राजनीतिक दल, नागरिक समाज सबैलाई आफुहरुको आन्दोलनमा साथ दिन पनि आग्रह गरिएको छ।
रवि लामिछानेमाथि भइरहेको अनुसन्धान प्रभावित पार्ने उदेश्यले रास्वपाले प्रदर्शन जारी राखेकाले आफुहरुले खबरदारी सभा गर्न लागेको सहकारी बचत पीडित संघर्ष समितिका संयोजक किरण श्रेष्ठले बताए।
‘हामीले भोलि विशाल खबरदारी सभा आयोजना गरेका छौं, सबै पोखरेली न्यायप्रेमी सभामा आउनुहुनेछ,’ उनले भने, ‘सहकारी ठगीमा संलग्न कसैले पनि उन्मुक्ति नपाओस् र पीडितले न्याय पाओस् भन्ने मात्र हाम्रो माग छ।’
