कार्यवाहक प्रधानमन्त्रीसमेत रहेका सहरी विकास मन्त्री प्रकाशमान सिंहले सहरी विकास सचिव मणिराम गेलालसँग कार्यसम्पादन करार सम्झौता गरेका छन्।
मंगलबार मन्त्रालयमै कार्यसम्पादन करार सम्झौता भएको हो।
गत भदौ २७ गते सिंहले प्रधानमन्त्री केपी शर्मा ओलीसँग कार्यसम्पादन करार सम्झौता गरेका थिए।
सो सम्झौतालाई आधार मानेर मन्त्रालयभित्रबाट गर्नुपर्ने काम प्रभावकारी बनाउन मन्त्री र सचिवबीच सम्झौता भएको हो।
‘प्रधानमन्त्रीज्यूसँग मैले सहरी विकास मन्त्रालयको जिम्मेवारी सम्हालेपछि कार्यसम्पादन सम्झौतमा हस्ताक्षर गरेको थिएँ। ती प्रतिवद्धताअनुसार कार्यसम्पादनमा बाधा अड्चन नआउने गरी आयोजनाहरू समयमा सम्पन्न हुने गरी कार्यसम्पादन सम्झौता अक्षरश पालना हुने विश्वास लिएको छु,’ उनले भने।
सचिव गेलालले मन्त्रालयको कार्यक्षेत्रभित्र पर्ने व्यवस्थित र योजनाबद्ध सहरी विकास, सुरक्षित र किफायती आवास, सुलभ र प्रकोप प्रतिरोधी भवन, स्थानीय पूर्वाधारको क्षेत्रमा सञ्चालित आयोजना र कार्यक्रम तथा सेवा प्रवाहमा सुधार, तोकिएको समयावधिमा आयोजना सम्पन्न गर्ने, विकास निर्माण र सुशासनमा जनताले प्रत्यक्ष अनुभूति गर्ने गरी उपलब्धि हासिल गर्नेतर्फ ध्यान दिई स्वच्छ र सफा वातावरणसहितको योजनाबद्ध सहरीकरणद्वारा राष्ट्रको विकास गर्ने गरी कार्यसम्पादन सम्झौता गरेको मन्त्री सिंहको सचिवालयले जनाएको छ।
