सामुदायिक रेडियोहरूको छाता संस्था सामुदायिक रेडियो प्रशारक संघ (अकोराब) को अध्यक्षमा अर्जुन गिरी निर्वाचित भएका छन्।
ललितपुरमा चलेको ८ औं अधिवेशनबाट गिरी सर्वसम्मत रूपमा अध्यक्षमा चयन भएको निवर्तमान महासचिव किशोरजङ्ग थापाले जानकारी दिए।
अधिवेशन सरकारका प्रवक्ता पृथ्वीसुब्बा गुरूङले उद्घाटन गरेका थिए।
दाङको तुलसीपुर उपमहानगरपालिका वडा नम्बर १२ घर भएका गिरी यसअघि पनि अकोराबको अध्यक्ष थिए।
उनी रेडियो तुलसीपुरका स्टेशन म्यानेजर पनि छन्। अध्यक्ष गिरीलाई रेडियोहरूको क्रेज जोगाइराख्ने चुनौती छ।
अकोराबको वरिष्ठ उपाध्यक्षमा चितवनका गोविन्द देवकोटा चयन भएका छन्। उनी अकोराबमा महासचिव भइसकेका थिए।
यस्तै उपाध्यक्षमा नवीननरसिंह नेपाली र गोपाल बराइली चयन भए। महासचिवमा बन्दना दनुवार र सचिवमा भक्त स्याङ्तान चयन भएका छन्।
बाँकी पदहरूमा भने एकभन्दा बढी उम्मेदवारी परेकोले आइतबार निर्वाचन गर्ने तयारी छ।
अकोराबको चुनाव हुनुपूर्व पाँच वटा संस्थाले सहमतिमै अघि बढ्ने समझदारी गरेका थिए।
