कोशी प्रदेश सरकारको नेतृत्व गरिरहेको नेकपा (एमाले) ले पूर्व मुख्यमन्त्री केदार कार्कीको अनशनलाई ‘नौटंकी’ को संज्ञा दिँदै मुख्यमन्त्री कार्यालयमा आएर समाधान खोज्न सुझाव दिएको छ।
बुधबार प्रदेशसभाको बैठकमा विशेष समयमा बोल्दै एमालेका सांसद तिलचन पाठकले (चिन्तन) ले पूर्व मुख्यमन्त्री कार्कीले सरकारले बालबालिकाको निःशुल्क उपचारको कार्यक्रम कटौती गरेको भनेर भ्रम फैलाएको आरोपसमेत लगाएका छन्।
‘सरकारले कार्यक्रम कटौती गरेको छैन, उपचार कार्यक्रम निरन्तर छ,’ उनले भने ‘बरु उहाँकै पालामा अस्पतालहरूले फर्जी बिल पेश गरेको कुरा आएको छ।’
झापाका सांसद पाठकले पूर्व मुख्यमन्त्रीको अनशनलाई अराजक, असंसदीयसमेत भनेका छन्। ‘अहिले कोशी प्रदेशमा अराजक, अमर्यादित, अनुशासनहीन र असंसदीय गतिविधिले हामी लज्जित भएका छौं, यो अराजक हर्कतले संसदीय मूल्य मान्यताको धज्जी काढ्ने काम भएको छ,’ उनले भने ‘विशेषाधिकार समिति बनाएर यसको छानबिन गरेर कारवाही गर्नुपर्ने हुन्छ।’
रातो किताबमा आएका योजनाहरू केदार कार्कीकै पालामा कटौती भएको आरोप लगाउँदै पाठकले अहिले उनले उठाएका मागहरू सबै सरकारी योजनामा समेटिएको दाबी गरे। ‘उहाँको अनशनले संसद्कोसमेत अपमान भएको छ,’ उनले भने ‘कि लास्ट बेञ्चरमा रहने सदस्यका रूपमा आफूलाई स्थापित गर्नुभएकाले उहाँको बुझ्ने क्षमता पनि हरायो कि ?’
उनीसँग छलफल गर्न कार्यदल बनाउन एमाले तयार रहेको बताउँदै उनले मुख्यमन्त्री कार्यालयमा आएर छलफल गर्न पनि सुझाव दिएका छन्।
प्रदेशका १० वर्ष मुनीका बालबालिकाको निशुल्क उपचारको कार्यक्रम कटौती गरेको, शैलजा आचार्य हृदयरोग अस्पताललाई प्राथमिकता नदिएको लगायतका ९ बुँदे माग अघि सारेर कार्कीले मंगलबारदेखि अनशन थालेका हुन्।
उनको अनशनस्थल नजिकै रहेको प्रदेशसभा बैठकमा बुधबार कांग्रेसकै सांसदहरूले पनि अनशनबारे केही बोलेनन्। एमालेले भने अनशनको विरोध गर्न विशेष समय नै लिएको थियो।
