प्रधानमन्त्री केपी शर्मा ओलीले समयको माग र जनअपेक्षा सम्बोधन गर्ने गरी नेपाल प्रहरी र सशस्त्र प्रहरी बलसम्बन्धी विद्यमान कानुन संशोधन विधेयक ल्याउन सम्बन्धित मन्त्रालयलाई निर्देशन दिएका छन्।
प्रधानमन्त्री निवास, बालुवाटारमा उपप्रधानमन्त्री एवं अर्थमन्त्री विष्णुप्रसाद पौडेल, गृहमन्त्री रमेश लेखक, मुख्यसचिव एकनारायण अर्याल, दुवै मन्त्रालयका सचिवहरू र दुवै संगठन प्रमुखहरूसहित आइतबार साँझ भएको छलफलमा प्रधानमन्त्री ओलीले ती कानुनलाई समयानुकूल र वस्तुनिष्ठ बनाउनुपर्ने बताएका हुन्।
उनले मुलुकमा शान्ति सुरक्षा र सुशासन कायम गर्न तथा संगठनभित्र सानो तहदेखि माथिल्लो तहसम्मको सुविधा समेतलाई ध्यान दिएर प्रस्ताव ल्याउन आग्रह गरे।
ती दुवै कानुन संशोधन गर्ने विधेयकको मस्यौदा रायका लागि गृह मन्त्रालयले अर्थ मन्त्रालयमा पेस गरेको सन्दर्भमा प्रधानमन्त्री ओलीले आर्थिक र प्रशासनिक पक्ष अध्ययन गरेर छिटो विधेयक अघि बढाउन अर्थ मन्त्रालयलाई निर्देश गरे। दुवै विधेयक संसदमा पेस गर्ने विषय सरकारको सय दिनभित्रको प्राथमिकतामा परेको छ।
छलफलमा अर्थमन्त्री पौडेलले विधेयक समग्र रूपमा अध्ययन गरेर छिटो निष्कर्ष निकालिने बताए। गृहमन्त्री लेखकले प्रस्तावित विधेयक ल्याउँदा प्रहरी संगठनमा ऊर्जा थपिनुका साथै मुलुकको आर्थिक दायित्व बचत हुने बताए।
