नेपाली काँग्रेस लुम्बिनी प्रदेशका प्रमुख सचेतक जन्मजय तिमिल्सिना मन्त्री बन्ने लगभग पक्कापक्की नै थियो।
मंगलबार बेलुकीसम्म तिमिल्सिनाकै नेतृत्वमा सरकारमा जाने चर्चा थियो। सोही अनुसार बुधबार बिहान शपथका लागि उनी प्रदेश बुटवलस्थित प्रदेश प्रमुखको कार्यालय पुगेका थिए।
बिहान ८ बजे शपथ ग्रहण कार्यक्रम थियो। कांग्रेसबाट पाँच जना मन्त्री बन्ने तय थियो। तर अन्तिममा चार जनाले मात्रै शपथ लिए। एक सांसदका अनुसार तिमिल्सिना शपथका लागि तयार भएर गएका समेत थिए,नाम हटाइएपछि उनी त्यसै फर्किएका थिए।
कांग्रेस लुम्बिनी प्रदेश प्रवक्ता तथा मन्त्री प्रचण्ड बिक्रम न्यौपानेले पनि शपथ कार्यक्रममा प्रमुख सचेतक तिमिल्सिना बुटवल गएको बताए ।
‘किन यस्तो भयो त्यो मलाई थाहा भएन,’ न्यौपानेले भने, ‘तर, मैले एक दुई दिनमै उहाँबारे टुँगो लाग्ने कुरा सुनेको छु ।’
काँग्रेस भित्र संस्थापन इतर समुहबाट न्यौपाने एक्ला मन्त्री हुन्। अरु तीन जना सबै संस्थापन पक्षधर हुन्। तिमिल्सिना पनि संस्थापन पक्षधर हुन्।
स्रोतका अनुसार प्रदेशमा मन्त्री पठाउँदा संस्थापन पक्षले एकलौटी गरेको भन्दै इतरका नेताहरुले विरोध जनाएपछि अन्तिममा आएर तिमिल्सिनाको नाम काटिएको हो।
‘पाँच जना मन्त्री बनाउँदा दुई इतर पक्षले दुइ मन्त्रालय पाउनुपर्ने अडान राखेपछि तिमिल्सिनाको नाम काटिएको भन्ने छ,’ एक नेताले भने।
इतर पक्षधर मानिने कांग्रेस लुम्बिनी प्रदेश सभापति अमरसिंह पुनले मन्त्री छनोट प्रक्रियाबारे आफूलाई कुनै कुरा जानकारी नभएको बताए।
उनले विधि, पद्धति र प्रक्रिया मिचेर अगाडि बढ्ने खोज्ने प्रवृत्तिका कारण पार्टी कमजोर हुने बताएका थिए।
