नेकपा (माले) का महासचिव सिपी मैनालीले मुलुक विदेशीहरुको चक्रव्यूहमा फसेको बताएका छन्।
शनिबार पुष्पलाल अध्ययन समितिले काठमाडौंमा आयोजना गरेको पुष्पलाल जन्मशताब्दी समारोहमा बोल्दै महासचिव मैनालीले दलहरुलाई प्रयोग गरेर नेपाललाई विदेशीहरुले आफ्नो नियन्त्रणमा लैजाने रणनीतिक लक्ष्य बनाएको बताएका हुन्।
त्यसकारण अहिले नै मुलुकमा जनवाद र समाजवाद आउने आफूले नदेखेको उनले बताए।
'दलहरुलाई प्रयोग गरेर नेपाललाई विदेशीको नियन्त्रणमा लैजाने दोस्रो रणनीतिक लक्ष्यमा लागेको छ । यस्तो खालको कमजोरीहरु हाम्रोमा छन । अहिले तत्कालै जनगणतन्त्र, तत्कालै समाजवाद आउने कुरा त म देख्दिनँ,' उनले भने।
तर अहिले तत्कालै एउटा फेरी एउटा राजनीतिक परिवर्तनको आवश्यक्ता भने मुलुकमा देखिएको उनले बताए।
'त्यसले मुलुक विदेशीहरुको चक्रव्युहबाट मुक्त भएर स्वतन्त्र समाजको रुपमा अघि जानसक्छ । देशमा जनसत्ता आउन सक्ला । र पूँजीवाद विरोधी समाजवाद निर्माण गर्ने परिस्थितिको सृजना हुनसक्ला,' उनले भने।
कम्युनिष्टहरुले आफ्ना कमजोरी सुधार गर्दै अघि बढे समाजवाद निर्माणको आधार भने तयार हुनसक्ने मैनालीले बताए।
महासचिव मैनालीले नेपालमा अहिले पनि कम्युनिष्ट शक्तिहरुबीच एकता भइहाल्ने अवस्था नरहेको पनि बताए।
(न्युज एजेन्सी नेपालबाट)