नेपाल कम्युनिष्ट पार्टीका महासचिव नेत्रविक्रम चन्द 'विप्लव'ले नेपालमा एउटै कम्युनिष्ट बनाउन सकिने बताएका छन्।
शनिबार पुष्पलाल अध्ययन समितिले काठमाडौंमा आयोजना गरेको पुष्पलाल जन्मशताब्दी समारोहमा बोल्दै महासचिव विप्लवले एउटै कम्युनिष्ट पार्टी बनाएर नेपाली कम्युनिष्ट आन्दोलनलाई २००६ सालमा फर्काउन सकिने बताएका हुन्।
समाजवादी मोर्चा बनाएर आफूहरूले त्यसको प्रयत्न पनि गरिरहेको उनले बताए। समाजवादी मोर्चा नभए नयाँ ढंगले मोर्चाबन्दी गरी एकताका प्रस्तावहरू खडा गर्नुपर्ने उनले बताए।
सबै विश्लेषण गरेर पस्ताव बनाएर छलफल गरियो भने कम्युनिष्ट आन्दोलन २२ वटा पार्टीहरू फेरि पुनर्जागृत भएर ६ सालमा फर्किन पनि सक्छ।एउटै कम्युनिष्ट पार्टी बन्न पनि सक्छ,' उनले भने, ' त्यसका लागि हामीले आँट गर्नुपर्छ र प्रस्ताव पनि गर्नुपर्छ।'
उनले अहिले पनि नेपालमा ७० प्रतिशतभन्दा बढी जनता कम्युनिष्ट र समाजवादी समर्थक भएकाले निराश हुन नपर्ने बताए।
'एकचोटी कम्युनिष्ट आन्दोलनमा एउटा महान् बहस बहस, उच्च बहस फराकिलो बहस जरूरी छ। त्यो आँट अग्रज नेताहरूले गर्नुहोस्,' उनले भने, 'यहाँसम्म आएकामा उहाँहरूकै योगदान हो। हामी अनुयायी हौं। हाम्रा कयौं कुराहरू नमिलेर फरक ठाउँमा छौं।'
नेपालको कम्युनिष्ट आन्दोलनलाई एक ठाउँमा ल्याउने गरी नयाँ प्रस्ताव गरियो भने नेपाललाई ६ सालमा फर्काएर नयाँ घोषणा पत्र फेरि तयार गरेर एउटै कम्युनिष्ट पार्टी बनाउन सकिने उनले बताए।
'आधार बनाएर गयौं भने एउटै कम्युनिष्ट पार्टी निर्माण गरेर नेपाललाई अहिलेको संकटबाट निकास मात्रै दिने होइन कि यो शताब्दीमा नेपाललाई समाजवादी देश बनाउन सक्ने स्थिति छ,' उनले भने।
सदन, सडक र विद्रोहमध्ये कुनैपनि मोर्चबाट जनतालाई साथमा लिएर नेपाललाई समाजवादमा रूपान्तरण गर्ने बदल्न सक्ने सम्भावना रहेको पनि उनले बताए।
-1693477835.jpg)
