प्रमुख प्रतिपक्षी नेपाली कांग्रेसका सांसद मोहनबहादुर बस्नेतले कल बाइपास गरी हुने अर्बौं रुपैयाँ घोटाला रोक्न टेरामक्स भित्राउने आफूले आँट गरेको दाबी गरेका छन्।
प्रतिनिधि सभाको शुक्रबारको बैठकमा बोल्दै उनले टेरामक्स भिओआईपी प्रकरणलाई रोक्ने विधि भएको बताए।
कल बाइपास गरेर वार्षिक रुपमा २५ अर्ब घोटाला हुने गरेको भन्दै उनले टेरामक्स प्रविधिपछि सो घोटाला रोक्ने उनको भनाइ थियो।
‘टेरामक्समा तीन जना सांसदहरुको नाम मुछिएको छ। यसको बारेमा कुरा उठाउने गरेका छन् बेलाबेलामा,’ उनले भने, ‘उचित दिन आएछ भने म यसको जबाफ दिनेछु। टेरामक्स एउटा यस्तो विधि हो, जसले टेलिफोनमा कल बाइपास गरेर खाने धन्दा भिओआइपी प्रकरणलाई नियन्त्रण गर्छ, संसारभरी यही विधिले नियन्त्रण गरेको छ र ठगी गर्ने धन्दा भएको छैन।’
टेरामक्स भन्ने विधि कल बाइपास गरेर खाने भिओआईपी प्रकरणलाई रोक्ने विधि होइन भने विधि के हो भन्ने प्रश्न पनि उनले गरेका थिए।
‘संसारभरि विधि हुने यहाँचाहीँ विधि नहुने के हो त? मैले आँट गरेर यो विधि सुरुवात गर्न खोजेको हुँ। २५ अर्ब बार्षिक घोटाला गर्नेले कति अर्ब खर्च गरेर सम्बन्धित निकायलाई ढाकछोप गर्ने, थेग्ने अथवा डाइर्भट गर्न खोजेको हो यो भविष्यले बताउला,’ उनले भने।
सांसद बस्नेतले अन्य सांसदहरूलाई लक्षित गर्दै दिएको एक अभिव्यक्तिमा भने नेकपा (एमाले) की सांसद सम्झना थपलियाले असंसदीय भन्दै हटाउन माग गरेकी थिइन्। सभामुख देवराज घिमिरेले यसबारे पछि निर्णय गरिने जबाफ दिएका थिए।
(न्युज एजेन्सी नेपाल)