नेकपा एमालेका सांसद गोकुल बाँस्कोटाले दुग्ध किसानहरूले सरकारसँग भिख नभई पसिनाको मूल्य माग गरेको बताएका छन्।
बिहीबार प्रतिनिधि सभा बैठकमा बोल्दै सांसद बास्कोटाले सरकारले दुग्ध किसानहरूको करिब एक वर्ष देखिको माग सम्बोधन गर्न नसकेको बताए।
दुग्ध किसानको ५ अर्ब बढीको रकम भुक्तानी तत्काल गर्न उनले सरकारको ध्यानाकर्षण गराए।
‘दुग्ध किसानहरूले सरकारसँग ५ अर्ब बढी रकम पाउन सकेका छैनन्। किसानले नङ्ग्रा ख्याएको, पसिना बगाएर परिवार र घर चलाउन चाहेको कुरालाई महिनौंदेखि भुक्तानी नदिएर किन रुवाउँदै छौं। किसानलाई रुवाएर सरकार हासेर बस्ने हो? जनताको सरकार होइन? जनताप्रति जवाफ दिनुपर्छ कि पर्दैन? अहिले पनि दुग्ध विकास संस्थाले १ अर्ब ५५ करोड भन्दा माथि भुक्तानी गर्न बाँकी छ,’ उनले भने।
उनले दुग्ध किसानहरूले न्याय पाउनको लागि अब सडक आन्दोलन नभएर फ्रान्सको जस्तो गरी ट्याक्टर, गाई भैँसी सडकमा छोड्नुपर्ने हो? भन्दै प्रश्न गरे।
‘सरकारको नेपाल प्रहरी, नेपाल आर्मी जस्ता संस्थाहरूमा दुग्ध अनिवार्य रूपमा दुग्धजन्य पदार्थहरू जाने कुरा, चक्लेट उद्योगहरू सञ्चालन, धुलो दुग्ध उत्पादन गरी मुलुक भित्रका उद्योगलाई प्रवर्द्धन गर्ने विषयमा सरकारको ध्यान जानुपर्छ,’ उनले भने, ‘सरकारसँग दुग्धको भुक्तानी पाउन फ्रान्समा जस्तो ट्याक्टर,गाई भैँसी सडकमा ल्याएर छोड्ने पर्ने हो? के गर्यो भने किसानले न्याय पाउँछन्। किसानहरूले सरकारसँग भिख मागेका होइनन्। किसानले पसिनाको मूल्य मागेको हो। त्यसतर्फ सरकारको गम्भिर ध्यानाकर्षण होस्।’
