सत्तारूढ नेकपा (एमाले) का अध्यक्ष केपी शर्मा ओलीले संघीय संसद सचिवालयका कर्मचारीहरूले राखेका माग वार्ताबाट छिटो समाधान गरिनुपर्ने बताएका छन्।
आइतबार संघीय संसद भवन परिसरमा पत्रकारहरूसँग कुराकानी गर्दै अध्यक्ष ओलीले वार्ताद्वारा माग सम्बोधन गरिनुपर्ने बताएका हुन्।
‘यो वार्ताद्वारा अबिलम्व सकारात्मक निस्कर्षका साथ समाधान गर्नुपर्छ,’ उनले भने।
अतिरिक्त काम गरेको सेवा सुविधा पाउनुपर्नेलगायत ११ बुँदे माग राखेर संसदका कर्मचारी जेठ २१ गतेदेखि आन्दोलनमा छन्। कानुन मन्त्री पदम गिरी नेतृत्वमा कर्मचारीसँग वार्ता गर्न तीन सदस्यीय समिति पनि गठन भइसकेको छ।
कर्मचारीहरूले आइतबार पनि 'संसद सेवाको कर्मचारीहरुमाथि श्रम शोषण गर्न पाइँदैन, ११ बुँदे माग पूरा गर, श्रम शोषण अन्त्य होस्, व्यवस्थापन समितिको निर्णय कार्यान्वयन गर, विधायिकामाथि कार्यपालिकाको हस्तक्षेप बन्द गर'जस्ता प्लाकार्डसहित लगायतका विरोध जनाएका थिए। (न्युज एजेन्सी नेपाल)
यो पनि: संसदका कर्मचारीको माग सम्बोधन गर्न कानुन मन्त्रीको नेतृत्वमा समिति गठन
