प्रमुख प्रतिपक्षी नेपाली कांग्रेसका सांसद विश्वप्रकाश शर्माले कास्कीको सुर्यदर्शन सहकारीबारे अनुसन्धान गरिरहेका प्रहरी निरीक्षक (इन्स्पेक्टर) लाई गृहमन्त्री रवि लामिछानेले सरूवा गरेको बताएका छन्।
२०८० भदौ ८ गते जिल्ला प्रहरी कार्यालय कास्कीमा हाजिर भएका इन्स्पेक्टर सूर्यबहादुर मगरलाई एक वर्ष पनि काम गर्न नदिएर गृहमन्त्रीले महोत्तरी सरूवा गरिदिएको शर्माको भनाइ छ।
‘गृहमन्त्रीजीले जेठ ६ गते यो संसदमा उभिएर भन्नुभएको थियो, पहिले पहिले मन्त्रीहरूले अनुसन्धान गर्थे, अहिले प्रहरीले गर्छ। अनि अनुसन्धान गरिरहेका प्रहरीलाई पहिले पहिले सरूवा गरिन्थ्यो, अहिले सरूवा गरिँदैन,’ आइतबारको प्रतिनिधि सभा बैठकको आकस्मिक समयमा बोलेका शर्माले भने, ‘उहाँले संसदको रोस्टममा उभिएर ठाडै झुट बोल्नुभएको थियो। जेठ ६ गतेभन्दा ठिक १० दिनअगाडि नेपाल प्रहरीले ५१९ जना इन्स्पेक्टरहरूको सरूवा गरेको थियो। त्यो सूचीको ५०३ नम्बरमा एउटा नाम छ, सूर्यबहादुर राना मगर। प्रहरी नियमावली २०७१ अनुसार सामान्यता सरूवा गरिएको ठाउँमा प्रहरीलाई एक वर्ष काम गर्न दिइन्छ।’
इन्स्पेक्टर मगर कास्की प्रहरी कार्यालयमा अपराध नियन्त्रण तथा अनुसन्धान शाखामा कार्यरत रहेको शर्माको भनाइ छ। ‘गृहमन्त्रीजी हिजो मालिक रहेको सुर्यदर्शन सहकारी त्यही कास्कीमा छ, जसउपर छानबिन चलिरहेको छ। मगर त्यही छानबिन गर्ने एउटा इन्स्पेक्टर थिए। तर मगरलाई समय नपुगीकनै हटाइयो। उनलाई वैशाख २६ गतेको निर्णयबाट डाँडा कटाएर महोत्तरी पठाइयो। यही रोस्टममा उभिएर प्रहरी इन्स्पेक्टर चलाउँदैनौं भन्नुहुन्थ्यो यत्तिको झुट बोल्न गृहमन्त्रीले रोस्टम प्रयोग गर्न पाउने कि नपाउने?’
कांग्रेसका महामन्त्रीसमेत रहेका शर्माले सुर्यदर्शन सहकारीका पीडितहरू सर्वोच्च अदालतको बहस सुन्नका लागि पोखराबाट काठमाडौं आए पनि बहस सुन्न रोकिएको बताए।
‘बहस सुन्न अदालतले पाँच जनालाई पास पनि दियो, तर प्रहरीले उनीहरूलाई गेटमै रोक्यो,’ उनले भने, ‘प्रचलन के छ भने आफ्नो मुद्दासँग बहस हुँदा अदालतले चाह्यो भने पीडितले बहस सुन्न पाउँछन्। तर रोकियो तर भित्र डोरग्याङका साथीहरू भित्र बसेर बहस सुनिरहनु भएको थियो।’
उपप्रधान तथा गृहमन्त्री लामिछानेमाथि सुर्यदर्शनलगायत विभिन्न सहकारीको बचत गोरखा मिडियामा ल्याएको आरोप छ। यसबारे संसदीय छानबिन समितिले पनि अध्ययन गरिरहेको छ। लामिछाने ग्यालेक्सी टेलिभिजनको सञ्चालक संस्था गोरखा मिडियाका प्रबन्ध निर्देशक थिए।
यो पनि: रविलाई विश्वप्रकाशको प्रश्न- जिबीको लोकेशन पत्ता लाग्यो भन्नु केटाकेटीपन कि भगाउने नियत?