प्रमुख प्रतिपक्षी नेपाली कांग्रेसका सांसद मोहनबहादुर बस्नेतले युवा तथा खेलकुद मन्त्री विराजभक्त श्रेष्ठलाई राजीनामाभन्दा पनि हिम्मतसाथ अघि बढ्न आग्रह गरेका छन्।
बजेटमाथि प्रतिनिधि सभाको बुधबारको छलफलमा भाग लिँदै सांसद बस्नेतले अरूलाई निराश बनाउने काम नगर्न खेलकुद मन्त्री श्रेष्ठलाई आग्रह गरेका छन्।
‘मन्त्रीज्यू युवा नै हुनुहुन्छ, राजीनामाको कुरा होइन हिम्मत गरेर अघि बढ्नुपर्यो यस्तो युवाले,’ उनले भने, ‘अरूलाई निराश बनाउने कुरा नगर्नुस्, बजेट नै कम छ तपाईंले धेरै ठाउँमा बाँड्नु भएन यसमा तपाईंको कमजोरी छैन।’
तर बजेट प्राथमिकीकरण के-केमा गर्ने भन्नेमा मन्त्री श्रेष्ठको भूमिका कमजोर रहेको उनले बताएका थिए।
पूर्वस्वास्थ्य मन्त्रीसमेत रहेका बस्नेतले सरकार, अर्थमन्त्रीसँग कुरा गरेर खेलकुदमा बजेट थप गर्न सकिने बाटो पनि सुझाएका थिए।
‘अर्थ मन्त्रालयसँग कुरा गर्नुभयो भने बजेट थप हुन सक्छ। म स्वास्थ्य मन्त्री हुँदा बजेट कम भयो, बजेट भाषणपछि १२ अरब पैसा थपेर लगेको हो,’ उनले भने, ‘त्यसकारण निराश हुने कुरा छैन।’
गणेशमान सिंह स्मृति बक्सिङ प्रतियोगिताको बजेट कटौती गरेकोमा भने उनले आपत्ति जनाएका छन्।
‘गणेशमान सिंह स्मृति बक्सिङ प्रतियोगितामा गत वर्ष ५० लाख बजेट थियो। अहिले १० लाख मात्रै छ,’ उनले भने, ‘मदन भण्डारी स्पोर्टस् एकेडेमीमा ५० लाख बजेट थियो बढाएर दुई करोड पुर्याउनुभयो। यो आपत्तिजनक छ, दबाबमा बनाइएको बजेट हो यो।’
उनले आफू मन्त्री हुँदा करिब ८ सय काजका कर्मचारी फिर्ता गर्दा दबाब आए पनि कसैको कुरा नसुनी अघि बढेको बताएका थिए।
भिडिओ: