राष्ट्रिय स्वतन्त्र पार्टीका सांसद हरि ढकालले एमालेको सरकार हुँदा भ्युटावरमा खर्चिएको पैसा स्टेडियममा खर्च नगरेर गलत भएको बताएका छन्।
बुधबार प्रतिनिधि सभामा खेलकुद मन्त्रालयका लागि विनियोजित बजेटमाथिको छलफलमा बोल्दै सांसद ढकालले एमालेका सांसदहरूलाई त्यतिबेला भ्यु टावर बनाउने कन्सेप्ट गलत थियो भन्ने स्वीकार गर्न आग्रह गरेका हुन्।
'यो देशमा स्टेडियम बनाउने पैसा हुँदैन, बजेट हुँदैन अथवा अर्थमन्त्री ज्यूले दिनुहुँदैन,' एमाले सांसदहरूलाई लक्षित गरी ढकालले भने, 'अल्लीपहिला तपाईंहरूको पालामा देशैभरी बनेका भ्यूटावर हेरौं त कतिवटा बन्थ्यो स्टेडियम? असरल्ल भ्यूटावर बनाउने कन्सेप्ट गलत थियो। भन्नुपर्छ।'
ढकालले युवा तथा खेलकुद मन्त्रालयबाट युवा भन्ने शब्द हटाइदिन पनि माग गरे।
'यो मन्त्रालय युवाका लागि हुँदै होइन्। यहाँ भएका युवारूका लागि यो देशमा बसौं बसौं लाग्ने कार्यक्रमहरू कहिले आए/ अहिले पनि आएनन्। भनेसी युवा किन जोड्नुपर्यो। पश्चिम नेपालका बद्रीकेदारमा मान्छेको भारी मान्छेले बोकिरहेका ती युवाहरूका लागि पनि यो मन्त्रालय काम छैन भने यो मन्त्रालयका अगाडि किन युवा लेखेको होला? युवा शब्द हटाइदिए हुन्छ,' उनले भने।
युवा र खेलकुदको विकासका लागि ०.१९ प्रतिशत मात्रै बजेट छुट्याइनु बिडम्बना रहेको सांसद ढकालले बताए।
उनले आफू सत्तापक्षकै सांसद भएर पनि बजेटको निर्मम विवेचना गरेपछि सत्तापक्षकै अन्य सांसदहरूले पनि बजेटको निर्मम समीक्षा गर्न हिम्मत गरेको बताए।
'गत जेठ २१ गते बजेटको छलफल गरिरहँदा सत्ता पक्षकै सांसद भएर पनि बजेटको निर्मम विवेचना गरेको थिएँ।त्यसयता सत्तापक्षकै माननीयहरूले सम्भवतः पहिलो पटक सदनमा बजेट विनियोजनमा हिक्मतका साथ निर्मम समीक्षा गर्न थाल्नुभएको छ। हिजो मात्रै भौतिक मन्त्रीले राम्रै भेट्नुभयो। त्यो पनि सत्तापक्षकै माननीयज्यूहरूबाट। त्यो पनि आफ्नै पार्टीका माननीयबाट,' उनले भने।
