सत्तारूढ नेकपा (माओवादी केन्द्र)का सांसद देवेन्द्र पौडेलले खेलकुद मन्त्री विराजभक्त श्रेष्ठलाई राजीनामा दिन्छु भनेर निरूत्साहित नहुन सुझाएका छन्।
बिहीबार प्रतिनिधि सभामा मन्त्रालयगत बजेटमाथिको छलफलमा बोल्दै सांसद पौडेलले खेलकुद मन्त्रालयमा बजेट कम भएकाले बरू बजेट बढाउन लड्नका लागि मन्त्री श्रेष्ठलाई आग्रह गरे।
‘तीन अर्ब ५० करोड युवा तथा खेलकुदमा छुट्याइएको छ। प्रतिशतका हिसाबले यो निक्कै थोरै हो। तपाईं लडिरहनुहोला। राजीनामा लेखेर निरूत्साहित हुने होइन,’ पौडैलले भने।
राजीनामा प्रधानमन्त्रीलाई दिएको/ नदिएकोबारे थाहा नभएको तर आफू पनि युवा भएकाले मन्त्री श्रेष्ठलाई मन्त्रालयको बजेट थप गर्न पहल गर्न पौडेलले सुझाव दिए।
मन्त्री श्रेष्ठले केही दिन अघि काठमाडौंमा आयोजित एक कार्यक्रममा सरकारलाई दिएको समर्थनबारे सोच्नुपर्ने बताउँदै आफू राजीनामा पत्र बोकेर हिँडेको बताएका थिए।
