नेपाली कांग्रेसका सांसद धनराज गुरूङले सरकारले वेडिङ हबदेखि बर्थिङ हबसम्म बनाउँदा हनिमुन हबपनि बनाउनुपर्ने बताएका छन्।
सोमबार प्रतिनिधि सभामा बजेटमाथिको छलफलमा बोल्दै कांग्रेस उपसभापतिसमेत रहेका गुरूङले बजेटमार्फत सरकारले लुम्बिनीलाई बर्थिङ हब बनाउने गरी योजना ल्याएको सन्दर्भ जोड्दै हनिमुन हब पनि बनाउनुपर्ने बताएका हुन्।
'लुम्बिनीमा लर्ड बुद्ध म्याटर्निटी हस्पिटल बनाउनुपर्छ भनेर पटकपटक भनेँ। अहिले बर्थिङ हब भनेर नयाँ आइडिया निकालिएको रहेछ,' उनले भने, 'यसमा एउटा कुरा अझै पुगेन । वेडिङ हब्स पनि भयो, बर्थिङ हब्स पनि भयो । अब एउटा हनिमुन हब्स भएन । हनिमुन सिटी भएन। हनिमुन सिटी पनि कहीँ न कहीँ राखिदिँदा के फरक पर्छ?'
सांसद गुरूङले चितवनको सौराहामा हनिमुन हब बनाउन समेत सुझाव दिए।
'सौराहामै हनिमुन सिटी बनाइदिऔं। विवाहित जोडीहरु त्यहाँ जान्छन् । नव दुलाहा, दुलही त्यहाँ जान्छन् । हात्ती चढ्छन् । घुम्छन्,' उनले भने।
त्यस्तै रारा तालमा हनिमुन सिप सञ्चालन गर्न पनि सांसद गुरूङले सुझाए।
'रारा ताल मात्रै हेर्न जानुभन्दा पनि त्यहाँ एउटा हनिमुनसिप बनाइदिउँ । १ हजार जोडी अट्ने सिप बनाइदिउँ । हनिमुन शिपमा गएर हनिमुन मनाउँछन् । के फरक पर्छ ? यसरी पर्यटन प्रबर्द्धन गर्दै जानुपर्छ,' उनले भने।
तर अब भ्यु टावर चाहीँ बनाउन नहुने उनले बताए।
'नो नट अगेन भ्यु टावर । डाडाँमा भ्यु टावर बनाएका छौँ भएको डाँडालाई खत्तम बनाएका छौँ । त्यसैले नो नट अगेन भ्यु टावर भन्नु आवश्यक छ,’ उनले भने।
