सत्तारूढ नेकपा (एमाले) का उपाध्यक्ष तथा पूर्वअर्थमन्त्री विष्णुप्रसाद पौडेलले अर्थमन्त्री वर्षमान पुनले चुनौती सिर्जना गर्ने र समाधान गर्ने अठोटका साथ बजेट ल्याएको बताएका छन्।
आइतबारको प्रतिनिधि सभा बैठकमा आगामी आर्थिक वर्ष २०८१/८२ को विनियोजन बजेट माथिको छलफलमा बोल्दै पौडेलले अर्थमन्त्री पुनले सहज बाटो भने नरोजेको बताए।
अर्थतन्त्रका चुनौतीकाबीच काम गर्ने कोसिस अर्थमन्त्री पुनको रहेको उनले बताए। बजेट तुलनात्मक रुपमा सन्तुलित ल्याएको पनि उनको भनाइ थियो।
‘बजेट तुलनात्मक रुपमा सन्तुलित छ। बाहिर आशंका र अनुमान गरेका थिए। अनुमानका आधारमा विरोध र समर्थनमा स्वरहरु पनि आएका थिए,’ उनले भने, ‘२० खर्बको हाराहारीमा बजेट बन्छ भनेर चर्चा आएका थिए। अर्थमन्त्रीले १८ खर्ब ६० अर्ब ३० करोडको बजेट प्रस्तुत गर्नुभयो।’
बजेटको आकार अनुसार स्रोत जुटाउन सजिलो भने नरहेको उनले बताए।
राजश्व संकलन,आन्तरिक ऋण र अन्तर्राष्ट्रिय सहयोगमा उच्च आकांक्षा बजेटले राखेको उनले बताए।
‘बजेटलाई उच्च आकांक्षी भन्दा राम्रो पदावली होला भन्ने लाग्छ। अर्थमन्त्रीले आफैले चुनौती सिर्जना गर्ने र सामना गर्ने अठोट गरेको पाएँ,’ उनले भने।
मुलुकका निम्ति चुनौतीका बीचमा काम गर्ने र चुनौतीलाई पार गर्ने अठोट अर्थमन्त्रीको रहेको उनको भनाइ छ।
पौडेलले बजेटमार्फत सरकारले आगामी आर्थिक वर्षमा ६ प्रतिशतको आर्थिक वृद्धि गर्ने लक्ष्य सम्भव रहेको पनि बताए।
