प्रमुख प्रतिपक्षी नेपाली कांग्रेसले सहकारी प्रकरणमा शुक्रबारसम्म सरकारले संसदीय छानबिन समिति बनाउनुपर्ने बताएको छ।
संघीय संसद भवन नयाँ बानेश्वरको ल्होत्से हलमा बिहीबार साँझ पत्रकार सम्मेलन गर्दै महामन्त्री गगन थापाले शुक्रबार बिहान ११ बजे बस्ने प्रतिनिधि सभा बैठकअघि सरकारले संसदीय छानबिन समिति बनाउनुपर्ने बताए।
‘भोलि बिहान संसद बैठक बस्नुअघि सरकारले संसदीय छानबिन समिति बनाउँछ भन्ने हाम्रो अपेक्षा छ,’ थापाले भने, ‘अब हामीलाई दुई-तीन जना बस्ने र मिलाउने कुरा धेरै विश्वास पनि भएन। हामी लचकदार भए पनि सरकारले अलमल्याउने कोसिस गर्यो।’
उनले पार्टीले शुक्रबार बिहान संसदीय दल बैठक राखेको पनि बताए।
‘हामी सरासर भोलि बिहान ११ बजे संसद बैठकमा आउँछौं। सरकार त्यसभन्दा पहिले संसदीय समितिको निर्णय गरेर आउँछ। त्यसबाहेक अरू कसैसँग छलफल गर्नु छैन,’ उनले भने।
महामन्त्री थापाले बिहीबारको सदनमा सरकारले नै मुठभेडको स्थिति सिर्जना गरेको आरोप लगाए। उनले सभामुख देवराज घिमिरेको भूमिकाप्रति पनि प्रश्न उठाएका छन्।
‘हामी गम्भीर र जिम्मेवार छौं। सभामुखको आजको भूमिकाप्रति हाम्रो ठूलो प्रश्न र असन्तुष्टि छ। सरकार पक्षबाटै आज मुठभेडको स्थिति सिर्जना गर्न खोजिएको छ,’ उनले भने, ‘भोलि बिहान ११ बजे संसद बैठक छ। हामी अपेक्षा गर्छौं त्यसअघि सरकारले संसदीय छानबिन समिति बनाउँछ।’