जनता समाजवादी पार्टी (जसपा) का केन्द्रीय कार्यकारिणी सदस्य मनीषकुमार सुमनले पार्टी फुटेको नभई केही साथीहरू बाहिरिएको बताएका छन्।
अशोक राई नेतृत्वमा आइतबार अपराह्न निर्वाचन आयोगमा नयाँ पार्टी दर्ता गर्न निवेदन दिएपछि पार्टी प्रवक्ता एवं केन्द्रीय कार्यकारिणी सदस्य सुमनले यस्तो कदमलाई राजनीतिक हत्याको संज्ञा दिए।
‘पार्टीमा कुनै समस्या थिएन, हठात् रूपमा पार्टी फुटाइयो भन्ने सुन्नमा आयो। पार्टी विभाजन भएको छैन। केही साथीहरू बाहिरिनुभएको छ,’ उनले भने, ‘उहाँहरूले आफ्नो राजनीतिक हत्या आफैँ गर्नुभएको छ। यस्तोमा के टिप्पणी गर्नु!’
बहुमत केन्द्रीय कमिटी अध्यक्ष उपेन्द्र यादवको पक्षमा रहेको बताए। पार्टी महाधिवेशनमा होमिएकाले अहिलेको परिघटनाले झन् गति दिने बताए।
‘केही साथीहरूलाई बाहिरिन मन लाग्यो, उहाँहरू जानुभयो। तर पार्टी अगाडि बढ्छ,’ उनले भने।
आइतबार सांसदहरू अशोककुमार राई, प्रदीप यादव, नवलकिशोर साह, वीरेन्द्र महतो, रञ्जु ठाकुर, हसिना खान, सुशीला श्रेष्ठले नयाँ दल दर्ताका लागि निर्वाचन आयोगमा निवेदन दिएका छन्।
उनीहरूले जनता समाजवादी पार्टी नाममा नयाँ पार्टी दर्ता गर्न आयोगमा निवेदन दिएका छन्। उनीहरूले पहिलेको पार्टीको नाम जनता समाजवादी पार्टी नेपाल रहेको बताएका छन्।
यो पनि: मोहम्मद इस्तियाक राईलाई प्रश्न- उपेन्द्र यादवसँग किन छुट्टिनुभयो?