प्रधानमन्त्रीसमेत रहेका नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले नेपाली कांग्रेससँगको सहकार्य तोडेका छन्।
माओवादी, नेकपा (एमाले), रास्वपा र जसपासहित नयाँ गठबन्धनबाट मन्त्रिपरिषद गठनको तयारी भइरहेको छ।
कांग्रेसले भने प्रधानमन्त्री प्रचण्डले अप्रत्याशित र अविश्वसनीय ढंगले गठबन्धन तोडेको प्रतिक्रिया दिएको छ।
‘प्रधानमन्त्री प्रचण्डजीले अप्रत्याशित र अविश्वसनीय ढंगले गठबन्धन भत्काउनुभयो,’ प्रमुख सचेतक रमेश लेखकले सेतोपाटीसँग भने, ‘कांग्रेसले अब रचनात्मक प्रतिपक्षीको भूमिका खेल्छ।’
प्रधानमन्त्री दाहालले केही समयदेखि मन्त्रिपरिषद पुनर्गठन गर्ने बताइरहेका थिए। उनले सत्ता साझेदार दलहरूसँग नयाँ मन्त्रीका नाम दिन पनि आग्रह गरेका थिए।
सभापति शेरबहादुर देउवाले पार्टीबाट मन्त्री भएकाहरूलाई आइतबार निवास बूढानिलकण्ठमा बोलाएर जुनसुकै बेला राजीनामाका लागि तयार रहन पनि आग्रह गरेका थिए।
तर गए राति नै बालुवाटारमा भएको छलफलबाट नयाँ समीकरण बनाउने सहमति प्रधानमन्त्री दाहालले गरेपछि कांग्रेसले उक्त कदमलाई अप्रत्याशित र अविश्वसनीय भनेको छ।