नेकपा माओवादीले वामपन्थी दलहरूको सरकार बनाउने निर्णय गरेको छ।
विहान प्रधानमन्त्री निवास बालुवाटारमा बसेको पदाधिकारी बैठकले वामपन्थीको मात्रै सरकार बनाउने निर्णय गरेको छ।
प्रवक्ता समेत रहेका पार्टी उपाध्यक्ष अग्नी सापकोटाले फेरि वाम ध्रुवीकरणका बाटोमा राजनीति अघि बढेको र आफूहरूले प्रधानमन्त्री समेत रहेका पार्टी अध्यक्ष पुष्पकमल दाहाल 'प्रचण्ड'लाई सुझाव दिएको जानकारी दिए।
उनले वाम पार्टीहरूको सरकार बनाउनका लागि अहिलेका सबै मन्त्रीहरूलाई फिर्ता बोलाउन पनि अध्यक्ष प्रचण्डलाई सुझाव दिएको र अहिले नयाँ सत्ता गठबन्धनका दलहरूसँग छलफल गरेपछि प्रचण्डले निर्णय लिने बताए।
उनले नयाँ मन्त्रीहरूले आजै शपथ लिने सम्भावना रहेको पनि बताए।
अहिले बालुवाटारमा नयाँ सत्ता गठबन्धनको बैठक बसिरहेको छ। प्रधानमन्त्री प्रचण्ड, एमाले अध्यक्ष केपी ओली, रास्वपा सभापति रवि लामिछाने र जसपाका अध्यक्ष उपेन्द्र यादव बैठकमा छन्।
बैठकमा कसलाई कुन मन्त्री बनाउने र मन्त्रालय भागबन्डा कसरी गर्ने भन्नेबारेमा छलफल भइरहेको छ।
आज बन्ने सानो आकारको मन्त्रिपरिषदमा माओवादी केन्द्रबाट वर्षमान पुन, एमालेबाट पदम गिरी जाने निश्चित भएको भएको छ।
रास्वपाबाट सभापति रवि लामिछाने र जसपाबाट अध्यक्ष यादव नै नयाँ बन्ने मन्त्रिपरिषद्मा जाने सम्भावना छ। कसैको पनि मन्त्रालय टुंगिसकेको छैन।
एकीकृत समाजवादी गठबन्धन र सरकारमा सहभागी हुनेबारे निर्णय गरिसकेको छैन।
गएराति अबेरसम्म प्रधानमन्त्री पुष्पकमल दाहाल प्रचण्ड, एमाले अध्यक्ष केपी शर्मा ओली, रास्वपा सभापति रवि लामिछाने र जसपा अध्यक्ष उपेन्द्र यादवबीच भएको छलफलमा सत्ता गठबन्धन परिवर्तनबारे कुराकानी र सहमति भएको थियो।
‘गएराति पार्टीहरूका अध्यक्षहरूबीचको छलफलमा संक्रमणकालीन न्याय सम्बन्धी विधेयकलाई अगाडि बढाउने र सत्ता गठबन्धन पनि परिवर्तन गर्नेबारेमा छलफल भएको थियो
बिहान सबै दलले आ-आफ्नो पार्टीको आन्तरिक छलफलमा गएरातिको सहमतिबारे ब्रिफिङ गरेका थिए।
प्रतिनिधि सभामा एमालेका ७९, माओवादी केन्द्रका ३२ र रास्वपाका २१ जना सांसद छन्। सरकार बनाउन तीन दलको संख्या पर्याप्त छ। सरकार निर्माणका लागि १३८ जना सांसद आवश्यक पर्छ।