नेविसंघ केन्द्रीय सदस्यहरूले अध्यक्ष दुजाङ शेर्पालाई विभिन्न मागसहित ज्ञापन पत्र बुझाएका छन्।
मंगलबार नेविसंघको पहिलो केन्द्रीय समिति बैठक बस्दैछ।
उक्त बैठकअघि केन्द्रीय सदस्य विजय ढुंगाना सहितले अध्यक्ष शेर्पालाई ज्ञापनपत्र बुझाएका हुन्।
पहिलो बैठकमा प्रत्येक केन्द्रीय सदस्यहरूले आफ्ना कुराहरू राख्न पाउनुपर्ने माग गरेका छन्। सबै सदस्यहरूले बोल्न पाउनुपर्ने भन्दै एक दिन अपुग हुने हुँदा यो बैठक नै अवैज्ञानिक र अव्यवहारिक रहेको पनि ज्ञापनपत्रमा उल्लेख छ।
यो बैठक तीन दिन राख्नुपर्ने पनि केन्द्रीय सदस्यहरूले माग गरेका छन्।
ज्ञापनपत्रमा ढुंगाना लगायतले ६ बुँदे विषयहरूमा छलफल हुनुपर्ने बताएका छन्।
बुँदाहरू:
१. संगठन भित्र विधि, विधान र पार्टीको निर्णय विपरित भएका विवादित मनोनयन र नियुक्तिको खारेजीको सम्बन्धमा।
२. कार्यसम्पादन समिति लगायत विभाग तथा समितिको गठन र स्वरूप सम्बन्धमा।
३. नेपाल विद्यार्थी संघको विधान संशोधन एवं परिमार्जन सम्बन्धमा।
४. केन्द्रीय निर्वाचन समिति, महाधिवेशनको मिति र कार्यतालिका सम्बन्धमा।
५. नेपाल विद्यार्थी संघ केन्द्रीय कार्यसमितिबाट गर्नुपर्ने कार्यक्रम र अभियानका सम्बन्धमा।
६. साथै बैठकको प्रक्रिया र तालिका तथा प्रस्तुत हुने प्रतिवेदन समेत बैठकमा उपस्थित सम्पूर्ण केन्द्रीय सदस्यलाई बैठक सुरू हुनु पूर्व उपलब्ध गराउनुपर्ने।