दाङको शान्तिनगर गाउँपालिकाको केन्द्र हाल कायम चिराघाटबाट जुम्लेकुलामा सार्ने निर्णय भएको छ।
बिहीबारको १५ औं गाउँसभा बैठकले गाउँपालिकाको केन्द्र हाल कायम रहेको वडा नं. ३ को चिराघाटबाट वडा नं. ४ को जुम्लेकुला (खैरेनी जाने सडक छेउमा) सार्ने निर्णय गरेको गाउँपालिकाका अध्यक्ष प्रमोद बस्नेतले सेतोपाटीलाई बताए।
गाउँसभामा ३७ सदस्यमध्ये वडा नं. ३ का वडाध्यक्ष मिनबहादुर केसीले मात्रै हाल कायम रहेकै स्थानमा पालिका रहनुपर्ने बताएका थिए। उनीबाहेक अन्यले पालिका जुम्लेकुला सार्ने सहमति जनाएका थिए।
चिराघाट भन्दा जुम्लेकुला झन्डै दुई किलोमिटर पश्चिममा पर्छ ।
‘गाउँपालिकाको कार्यालय अपायक र असुविधायुक्त ठाउँमा छ,’ अध्यक्ष बस्नेतले भने, ‘अब त्यसलाई सबैलाई पायक पर्ने ठाउँमा सारिने छ।’
जिपिएस म्यापिङ गरी पालिकाको केन्द्र भागमा पालिका सार्ने निर्णय गाउँ सभाले गरेको बस्नेतले बताए।
हालको चिराघाटमा रहेको पालिकाको कार्यालय खोंचमा छ। त्यहाँ फोन सम्पर्क पनि हुँदैन थियो। स्थानीयका अनुसार २०४६ सालमा बहुदल पुनर्स्थापनापछि बसेको तत्कालीन गाउँ विकास समिति बस्दै आएको ठाउँमा शान्तिनगर गाउँपालिकाको कार्यालय संचालन हुँदा सबैलाई पायक थिएन।
जुम्लेकुलाका कृष्ण केसी, पहलबहादुर डाँगीले आफ्नो निजी जग्गा समान ४ कठ्ठा र दुर्गा वली र निमबहादुर वलीले समान ३ कठ्ठा गरी कुल १३ कठ्ठा जग्गा शान्तिनगर गाउँपालिकाका लागि नि:शुल्क रूपमा उपलब्ध गराउने निर्णय पनि भइसकेको पालिका अध्यक्ष बस्नेतले बताए।
त्यसका साथै आसपासको थप सार्वजनिक जग्गासमेत आफ्नो स्वामित्व ल्याई झन्डै एक बिगाहा क्षेत्रफलमा शान्तिनगर गाउँपालिकाको कार्यालय स्थापना गरिने अध्यक्ष बस्नेतले जानकारी दिए।
