अमेरिकाले इराक र सिरियामा आक्रमण गरेको छ।
रोयटर्सका अनुसार अमेरिकाले शुक्रबार इराक र सिरियामा लडाकू विमानमार्फत हवाई आक्रमण गरेको हो। उक्त हमलामा परी ४० जनाभन्दा बढीको मृत्यु भएको छ।
अमेरिकाले इराक र सिरियामा रहेका इरानी समर्थक लडाकू र इरानी रिभोलुसनरी गार्ड समूहद्वारा प्रयोग भइरहेका ८५ वटाभन्दा बढी किल्लाहरूमा आक्रमण गरेको हो।
गत आइतबार जोर्डनस्थित अमेरिकी सैन्य शिविरमा भएको घातक आक्रमणको बदलामा अमेरिकाले इराक र सिरियामा आक्रमण सुरू गरेको पनि रोयटर्सले जनाएको छ।
जोर्डनमा इरानको ड्रोन हमलाबाट तीन जना अमेरिकी सेनाको मृत्यु भएको थियो। ४० जनाभन्दा बढी घाइते भएका थिए।
त्यसपछि अमेरिकाले इरान समर्थित लडाकूविरूद्ध जबाफी हवाई आक्रमण गर्न सक्ने चेतावनी दिएको थियो। तर कहिले आक्रमण गर्ने भन्नेबारे जानकारी दिएको थिएन।
अमेरिकी राष्ट्रपति जो बाइडेन र रक्षा मन्त्रालयका भनाइ उद्धृत गर्दै सिएनएनले लेखेको छ, 'हाम्रो प्रतिक्रिया सुरू भएको छ। यसका लागि समय र ठाउँ हामी नै छान्छौं। अमेरिका मध्यएसिया वा संसारमा कहीँ पनि लडाइँ र संघर्ष चाहँदैन। तर जसले हामीलाई नोक्सान पुर्याउँछन्, हामी जबाफ दिन्छौं।'
शुक्रबार अमेरिकाले इराक र सिरियाका विभिन्न सात ठाउँमा ३० मिनेटसम्म हमला गरेको जनाएको छ।