राष्ट्रिय प्रजातन्त्र पार्टी (राप्रपा) का निरञ्जनकुमार थापाले राष्ट्रिय सभा निर्वाचनको उम्मेदवारी फिर्ता लिएका छन्।
राष्ट्रिय सभा सदस्य पदका लागि पुस २३ गते लुम्बिनी प्रदेशबाट उम्मेदवारी दिएका राप्रपाका थापाले यसअघिको कार्यतालिका अनुसार दिउँसो १ बजे अगावै आफ्नो उम्मेदवारी फिर्ता लिएको लुम्बिनी प्रदेश निर्वाचन कार्यालयका प्रमुख लक्ष्मीदत्त चलाउनेले सेतोपाटीलाई बताए।
चलाउनेका अनुसार दिउँसो २ बजेभित्रै अब उम्मेदवारको अन्तिम नामावलीसमेत निर्वाचन कार्यालयले प्रकाशित गरिसकेको छ।
तोकिएको सयमा राप्रपाका थापाले निर्वाचन अधिकृत कुलप्रसाद पाण्डे समक्ष गई उम्मेदवारी फिर्ता लिएपछि त्यसको सूचनासमेत निर्वाचन कार्यालयले सार्वजनिक गरिसकेको छ।
थापाले उम्मेदवारी झिकेपछि अब लुम्बिनीमा दुई सिटका लागि ६ जनाका बीचमा प्रतिष्पर्धा हुने देखिएको छ।
महिला कोटामा गठबन्धनबाट नेपाली कांग्रेस गुल्मीकी नेता विष्णुकुमारी सापकोटा, नेकपा एमाले दाङकी नेता तुलसाकुमारी केसी र राष्ट्रिय प्रजातन्त्र पार्टीबाट कपिलवस्तुकी नेता विजयालक्ष्मी सिंहको उम्मेदवारी परेको छ।
त्यस्तै अन्यमा गठबन्धनबाट नेकपा माओवादी केन्द्र रोल्पाका नेता झक्कुप्रसाद सुवेदी, एमालेबाट पाल्पाका नेता झपेन्द्रबहादुर घर्ती र जनमत पार्टीबाट नवलपरासी पश्चिमका नेता बालगोविन्द चौधरीको उम्मेदवारी परेको छ।
राष्ट्रिय सभा सदस्यमा लुम्बिनी प्रदेशबाट अनिता देवकोटा र कुमार दसौंदीको कार्यकाल सकिन लागेपछि रिक्त हुन जाने पदपूर्तिका लागि माघ ११ गते निर्वाचन तोकिएको छ। लुम्बिनी प्रदेश सभामा ८७ सदस्य छन्। १०९ स्थानीय तहका दुई सय १८ प्रमुख/उपप्रमुख छन ।
राष्ट्रिय सभा सदस्य चुन्न लुम्बिनी प्रदेशमा कुल तीन सय पाँच जनाले मताधिकार पाउने छन् । लुम्बिनीमा प्रदेशमा प्रदेश सभा सदस्य तर्फ कूल मत भार चार हजार ६ सय ११ र स्थानीय तह तर्फको कुल मतभार चार हजार एक सय ४२ रहेको छ । यो प्रदेशमा कूल मतभार आठ हजार सात सय ५३ रहेको छ ।
प्रदेश सभा सदस्यको एक मत बराबर ५३ र स्थानीय तहका पदाधिकारीको एक मत बराबर १९ मतभार हुन्छ।
