नेकपा एकीकृत समाजवादीका अध्यक्ष माधवकुमार नेपालले एमाले अध्यक्ष केपी शर्मा ओलीको मति अझै नसुध्रिएको बताएका छन्।
बुधबार काठमाडौंमा पार्टी निकट विशेष कमिटीको कार्यक्रममा अध्यक्ष नेपालले ओलीले राष्ट्रिय सभा निर्वाचनमा एकीकृत समाजवादीलाई शून्य बनाउने प्रस्ताव राखेको बताउँदै उनको मति अझै नसुध्रिएको बताएका हुन्।
‘ओलीले बालुवाटार गएर राष्ट्रिय सभामा हामीलाई ६ सिट दिनुस्, कांग्रेसलाई ९ सिट दिनुस् तपाइँ ५ सिट राख्नुस् एकीकृत समाजवादीलाई जिरो बनाइदिऔं भन्नुभएछ। उहाँको मति अझै सुध्रिएको रहेनछ,’ अध्यक्ष नेपालले भने।
अध्यक्ष नेपालले सबै कम्युनिष्ट मिल्नका लागि मति पनि सप्रिन आवश्यक रहेको बताए।
‘मति नै सप्रिएको छैन भने केही पनि गर्न सकिँदैन। विचार, दृष्टिकोण र व्यवहार गलत छ भने जुधिन्छ। जुधेर आफ्नो पार्टीलाई अघि बढाउने काम गरिन्छ,’ उनले भने।
उनले प्रधानमन्त्री प्रचण्डले पनि ओलीको मति नसुध्रिएको कारण पुनः गठबन्धनमै फर्किएको बताए।
