नेपाली कांग्रेसका नेता शेखर कोइरालाले सत्ता गठबन्धनबाट राष्ट्रिय सभा चुनावमा उम्मेदवारी दर्ता गरेकाहरूलाई जिताउनुपर्ने अभिभारा रहेको बताएका छन्।
१९ सिटमध्ये सत्ता गठबन्धनका चार दलले भागबन्डा गरी साझा उम्मेदवार तय गरेका थिए। सोमबार उम्मेदवारी दर्तासमेत भइसकेको छ। कांग्रेसले १०, माओवादी केन्द्रले ६, नेकपा एकीकृत समाजवादीले २ र जसपाले १ सिटमा उम्मेदवारी दिएका छन्।
कांग्रेस नेता कोइरालाले पार्टीबाट छानिएका सबै उम्मेदवार र सत्ता गठबन्धनमा आबद्ध दलका उम्मेदवारलाई जिताउनुपर्ने अभिभारा रहेको बताएका हुन्।
‘पार्टी निर्णयबाट छानिएका सबै उम्मेदवारलाई भारी मतले जिताउने जिम्मेवारी हामी सबैको काँधमा आएको छ। सत्ता गठबन्धनमा आबद्ध दलहरुबाट राष्ट्रिय सभामा उम्मेदवारी दर्ता गराएका सबैलाई जिताउनु पर्ने अभिभारा पनि हामीसँग छ,’ कोइरालाले सामाजिक सञ्जाल फेसबुकमा लेखेका छन्।
उनले राष्ट्रिय सभा सदस्यको उम्मेदवार चयन प्रक्रिया सहज नभएको पनि बताए।
‘कांग्रेस जस्तो लामो इतिहास भएको संघर्षशील पार्टीमा धेरै निष्ठावान, निःस्वार्थ, योग्य र सक्षम आकांक्षी साथीहरुको सूची थियो। यसर्थ सीमित सिटका कारण पार्टीका साथीहरुलाई न्याय गर्न चाहेर पनि सम्भव भएन। तर पनि पार्टीमा अवसरको समान वितरण र सबै पक्षको हित स्थापित होस् भन्नेमा हामी निकै चनाखो थियौं,’ कोइरालाले भने।
न्यायोचित टिकट वितरण गर्न असमर्थ पार्टी निर्णयमा आफूले कमजोरी गरेको भए त्यसलाई स्वीकार्दै भविष्यमा अघि बढ्ने कोइरालाले बताएका छन्।
‘मेरो अभियान पार्टीमा अवसरको न्यायोचित वितरण होस् भन्ने नै हो। यो अभियानमा साथीहरुबाट विगतमा झैं निरन्तर साथ र सहयोग पाइरहने अपेक्षा समेत गर्दछु,’ उनले भने।
