भौतिक पूर्वाधार तथा यातायातमन्त्री प्रकाश ज्वालाले काठमाडौं उपत्यकामा अहिले खाल्डाखुल्डी नरहेको बताएका छन्।
ललितपुर महानगरपालिकाको १०५ औं स्थापना दिवसमा सोमबार मन्त्री ज्वालाले मन्त्रालयअन्तर्गतका कुनै पनि सडकमा अहिले खाल्डाखुल्डी नदेखिएको बताए।
उनले तीनै तहका सरकारले एकआपसमा समन्वय, सहकार्य र सहअस्तित्व गरेर अघि बढ्ने हो भने विकास निर्माण र पूर्वाधारका क्षेत्रमा अघि बढ्न सकिने बताए।
‘तीन तहकै सकारले एकआपसमा समन्वय, सहकार्य र सहअस्तित्व गरेर अघि बढ्ने हो भने विकास निर्माणको पूर्वाधारका क्षेत्रमा, कृषिको क्षेत्रमा, खानेपानी, फोहोर व्यवस्थापनको क्षेत्रमा, खोलाको समस्याको समाधानको क्षेत्रमा समस्या समाधान गर्न सकिन्छ,’ उनले भने।
तीन तहका सरकारको बीचमा राम्रो समन्वय, सहकार्य हुनुपर्ने र त्यसका लागि नेपाल सरकार तयार रहेको उनले बताए।
‘काठमाडौं उपत्यकालाई धुलोरहित बनाउने, यातायात व्यवस्थालाई सुगम, भरपर्दो र सुरक्षित बनउने कुरा होस्, यी सबै काममा सहकार्य गरेर अघि जाऔँ। विकास निर्माणको काममा सहकार्य गर्न हामी तयार छौँ,’ मन्त्री ज्वालाले भने, ‘काठमाडौं उपत्यका अहिले खाल्डाखुल्डीरहित बनेको छ।’
भौतिक पूर्वाधार तथा यातायात मन्त्रालयअन्तर्गतका कुनै पनि सडकमा अहिले खाल्डा नरहेको उनको दाबी छ।
