प्रमुख प्रतिपक्ष दल नेकपा एमालेले लुम्बिनी प्रदेश सरकारले बेथिति तथा मनपरी बढाएको भन्दै मुख्यमन्त्री डिल्लीबहादुर चौधरीलाई ज्ञापनपत्र बुझाएको छ।
प्रदेशमा कांग्रेस माओवादी गठबन्धन सरकारका कारण बेथिति, विसंगति र मनपरी बढेको भन्दै एमालेले ज्ञापनपत्रमार्फत् सरकारलाई १३ वटा प्रश्न सोधेर जवाफ माग गरेको छ।
संसदीय दलका नेता तथा निवर्तमान मुख्यमन्त्री लिला गिरिको नेतृत्वमा मुख्यमन्त्री तथा मन्त्रिपरिषद्को कार्यालय दाङ भालुबाङ पुगेको प्रतिनिधि मण्डलले मुख्यमन्त्री चौधरीलाई ज्ञापनपत्र बुझाएको हो।
एमालेले अहिलेको सरकारका काम गराई र शैली अपारदर्शी र असन्तुलित रहेको भन्दै सर्वत्र गुनासो चुलिएको, प्रदेश मातहतका सेवा प्रवाह प्रभावकारी नहुँदा जनतामा निराशा र आक्रोश बढिरहेको, संघीयताको कार्यान्वयन भएसँगै गठन भएको प्रदेश सरकारले सुरू गरेका महत्वपूर्ण आयोजना गठबन्धन सरकारले अलपत्र पारेको ज्ञापनपत्रमा उल्लेख गरेको छ।
सरकारले खानेपानी, स्वास्थ्यजस्ता अति संवेदनशील क्षेत्रमै बजेट कटौती गर्ने र योजना रोक्ने काम गरेको, पूर्वाग्रहका आधारमा बजेट रोक्ने, योजनाहरू प्रभावित बनाउने र बिचौलिया पोस्नेगरी बजेटको दुरूपयोग गरिँदा त्यसको असर प्रदेशको समग्र विकासमा पर्न गएको प्रमुख प्रतिपक्ष दलको आरोप छ।
त्यस्तै, प्रदेश सभामा विषयगत समितिहरूको गठनमा बेवास्ता गर्नुको साथै प्रतिपक्षी दलसँग विगतमा गरेका सहमतिहरूको कार्यान्वयन गर्नेतर्फ पनि सरकारले तदारूकता नदेखाएको एमालेको आरोप छ।
सरकारका कार्यशैलीले जनतामा निराशा बढाइरहेको भन्दै प्रतिपक्षी दल एमालेले बुद्ध जन्मस्थल लुम्बिनीमा संघीय सरकारका मन्त्री र लुम्बिनी प्रदेशका मुख्यमन्त्री सहभागी भएर गरिएको फोटो प्रदर्शनीमा बुद्ध जन्मस्थलसँग सम्बन्धित नेपाली भूमिबारे फैलाउन खोजिएको भ्रमबारे घोर विरोध गरेको छ। एमालेले त्यस बारेमा सरकारको धारणा समेत माग गरेको छ।
