नेकपा एमालेका उपाध्यक्ष विष्णु पौडेलले एमालेभित्र कुनै गुट नरहेको बताएका छन्।
पार्टीको लुम्बिनी प्रदेश अधिवेशनलाई सम्बोधन गर्दै उपाध्यक्ष पौडेलले पार्टी भित्र आफ्नो भविष्य नदेख्ने र दासत्वमा रमाउनेहरु गुटबन्दी गर्दै हिड्ने तर आफू गुटबन्दिमा बिश्वास नगर्ने बताए।
`४५ बर्षको पार्टी जीवनमा कहिल्यै गुटबन्दी नगरी यहाँसम्म आएको हुँ, गुटबन्दी कायरहरुको काम हो, पार्टीभित्र आफ्नो भविष्य नदेख्नेहरुले गुटबन्दी गर्छन् बिष्णु पौडेलले गुटबन्दीमा विश्वास गर्दैन,’ उनले भने।
एमालेभित्र नेतृत्व, नीति र विधिको प्रश्नमा कुनै मतभेद नभएको पनि उनले स्पष्ट पारे।
‘म र महासचिव शंकर पोखरेलका बीचमा लडाउने र एमाले भित्र विवाद होस् भन्ने चाहना राख्नेहरुका चाहना पानीका फोका जस्तै हुन्छ,’ उनले भने।
उपाध्यक्ष पौडेलले बाहिर बसेर एमालेमा बिग्रहको अपेक्षा गर्दै भविष्यवाणी गर्नेहरुलाई नेता कार्यकर्ताहरुले लुम्बिनी अधिवेशनको माध्यमबाट जवाफ दिनुपर्ने बेला आएको बताए।
`एमालेमा बिग्रहको अपेक्षा गर्दै एमालेको उन्नति र प्रगतिमा आफ्नो पतन देख्नेहरुको सपना कहिल्यै पूरा हुने छैनन्,´ पौडेलले भने।
उपाध्यक्ष पौडेलले गएको निर्वाचनको मतपरिणामले एमालेभित्र अझैपनी अवसरवादीहरु बाँकी रहेकोले देखिएको त्यस्ता अवसरवादीहरुलाई किनारा लगाएर पार्टीलाई बलियो बनाउनुपर्ने बताए।
