राष्ट्रपति रामचन्द्र पौडेलको आह्वानमा मंगलबार सर्वदलीय बैठक बस्दै छ।
अहिले बिहान साढे ८ बजे राष्ट्रपति भवन शीतल निवासमा बैठक बोलाइएको हो।
संसदमा जारी गतिरोध अन्त्य गर्नेलगायत विषयमा राष्ट्रपति पौडेलले बैठक बोलाएका हुन्।
यसअघि राष्ट्रपति पौडेलले संसदको गतिरोध अन्त्य गर्ने विषयमा सभामुख देवराज घिमिरे, प्रमुख प्रतिपक्षी नेकपा (एमाले) का अध्यक्ष केपी शर्मा ओलीसँग छलफल गरेका थिए।
आइतबार साँझ राष्ट्रपति पौडेलले संसदको चौथो ठूलो दल राष्ट्रिय स्वतन्त्र पार्टीका सभापति रवि लामिछानेसँग छलफल गरेका छन्।
यसैबीच सोमबार राति नै संसद्मा प्रतिनिधित्व गर्ने राष्ट्रिय मान्यता प्राप्त दलहरू बसेर ६० किलो सुन प्रकरण छानबिन गर्न उच्चस्तरीय समिति बनाउने निर्णय गरिसकेका छन्। आज बिहान ११ बजेभित्रका समितिको कार्यदेश टुंग्याउने समिति पनि उनीहरूले गरेको छन्। तदनुरूप कार्यदलको बैठकसमेत बस्दै छ।
आजै पुनः बैठक बसेर उच्चस्तरीय समिति गठन गर्ने समझदारी जुटिरहँदा ‘राष्ट्रपतिले सक्रियता देखाएको’ भन्दै एमाले असन्तुष्ट बनेको छ।
सोमबार सेतोपाटीसँग कुराकानी गर्दै एमाले संसदीय दलका उपनेता सुवास नेम्वाङले बैठकबारे आफूलाई थाहा नभएको बताएका थिए।
‘हामी त प्रधानमन्त्रीले बोलाएको छलफलमा जाँदै छौं, राष्ट्रपतिले बोलाइको बारे थाहा भएन,’ उनले प्रतिक्रिया थियो।
राष्ट्रपतिसँग एमालेको असन्तुष्टि
गत साउन ३१ गते राष्ट्रपति पौडेलले बोलाएपछि एमाले अध्यक्ष ओली उनलाई भेट्न शीतल निवास गएका थिए।
त्यहाँ राष्ट्रपति पौडेलले एमाले अध्यक्ष ओलीलाई सदनको गतिरोध हटाउन आग्रह गरेका थिए।
‘सदन नियमित सञ्चालन हुनुपर्छ। जनताको आवाज बोल्ने थलो अवरूद्ध हुनुहुँदैन। सदन कार्यसूचीमा प्रवेश गर्न नसक्दा जनतामा निराशा छाएको छ। यसको जम्मे दोष तपाईंलाई आउँछ,’ राष्ट्रपति पौडेलको भनाइ उद्धृत गर्दै एमालेका एक नेताले भने।
राष्ट्रपति पौडेलको त्यो भनाइबाट ओली असन्तुष्ट बनेका थिए।
‘उहाँले अलि बढी नै सक्रियता देखाउन खोज्नु भएछ। राष्ट्रपतिले सदन अवरोधको दोष अध्यक्ष ओलीकै थाप्लामा आउँछ भनेपछि उहाँले त्यहीँ असहमति जनाउनुभयो,’ एमालेका एक नेताले भने।
नागरिकतासम्बन्धी निष्क्रिय ऐन प्रमाणीकरण गर्ने, अदालतको फैसलालाई अनदेखा गरेर रेशम चौधरीलाई कैद माफ गरिदिनेलगायत काम गरेर राष्ट्रपति संविधानभन्दा दायाँबायाँ जान खोज्ने, संसद्को अवरोधको दोषी हामीलाई करार गर्ने भन्दै ओलीले असन्तुष्टि राखेको एमालेका एक नेताले बताए।
एक नेताले दिएको जानकारीअनुसार राष्ट्रपतिले बोलाएको सर्वदलीय बैठकबारे एमालेले प्रधानमन्त्री पुष्पकमल दाहाल ‘प्रचण्ड’सँग पनि असन्तुष्टि राखिसकेको छ।
‘प्रधानमन्त्री राति १० बजेसम्म राष्ट्रिय दलसँग बसेर सहमति गर्न खोजिराख्नु भएको छ। आज दिउँसो पनि बैठक बस्दै छ,’ ती नेताले भने, ‘राष्ट्रपतिले फेरि किन बैठक बोलाउनुपर्यो! हामीले प्रधानमन्त्रीलाई पनि रोक्न भनेका छौं।’
-शीर्षक सच्याइएको*
