नेपाली कांग्रेसका महामन्त्री गगनकुमार थापाले कसैले पनि गठबन्धन भत्काउने धराप नथाप्न चेतावनी दिएका छन्।
शुक्रबार गठबन्धन दलहरूले राष्ट्रपति निर्वाचनको सन्दर्भमा बागमती प्रदेशका सांसदहरूलाई केन्द्रित गरेर काठमाडौंमा आयोजना गरिएको अभिमुखीकरण कार्यक्रमलाई सम्बोधन गर्दै महामन्त्री थापाले वर्तमान गठबन्धन भत्काउने धराप नथाप्न चेतावनी दिएका हुन्।
उनले आफूहरूका बीचमा भएको सहमति पाँचै वर्ष कार्यान्वयन भएर अगाडि बढ्ने बताए।
उनले राष्ट्रपतिको निर्वाचनपछि गठबन्धन भत्किने र नेपाली कांग्रेसको नेतृत्वमा सरकार बन्ने भनेर भ्रम फैलाइएको भन्दै त्यस्तो भ्रममा नपर्न आग्रह गरे।
महामन्त्री थापाले आफूहरूका बीचमा भएको सहमति कार्यान्वयन नभएमा दलहरू माथिको इमानदारिता र विश्वसनीयतामा प्रश्न उठ्ने भन्दै त्यसो हुन नदिने बताए।
उनले नेपाली कांग्रेसका कोही पनि नेताहरूलाई भेटेर गठबन्धन भत्काउने चकचक नगर्न चेतावनी दिए।
‘अहिले भर्खर म समाचार पढ्दै थिएँ। साथीहरू आएर निर्वाचनको बेलामा यसलाई अल्मल्याउने कोशिस गरिराख्नुभएको छ। र फागुन २५ गतेपछि नेपाली कांग्रेसको नेतृत्वमा फेरि सरकार बन्छ। यो गठबन्धन टिक्दैन भन्दै हुनुहुन्छ’, उनले भने, ‘यो पटक हामी पनि संलग्न छौं। नेपाली कांग्रेसको तर्फबाट महामन्त्रीको हैसियतबाट पनि यो कुरा भन्छु- नेपाली कांग्रेस पार्टीसँग अब कोही चकचक गर्न नआए हुन्छ। कोही चल्न नआए हुन्छ। पाँच वर्ष यो कहीँ कतै जान्न।’
महामन्त्री थापाले प्रधानमन्त्री पुष्पकमल दाहाललाई प्रधानमन्त्री बनाइराख्नका लागि मात्रै यो गठबन्धन नबनेको स्पष्ट पारे। दाहाललाई नेकपा (एमाले) ले पाँचै वर्ष प्रधानमन्त्री दिएको भए पनि त्यसलाई त्यागेर नयाँ गठबन्धन बनाइएको उनको भनाई छ।
त्यस्तै नेकपा(एकीकृत समाजवादी)का अध्यक्ष माधवकुमार नेपाललाई पनि एमालेले राष्ट्रपतिको उम्मेदवार अथवा एमालेको अध्यक्ष नै बनाउन पनि तयार हुने स्थिति रहेको बताए। उनले गठबन्धनलाई बचाएर लानुपर्नेमा जोड दिए।
‘प्रधानमन्त्री पुष्पकमल दाहाललाई प्रधानमन्त्री हुने कुरा नै महत्वको कुरा थियो र त्यो कुरा नै प्रधान कुरा थियो भने यो गठबन्धनमा आइराख्नै पर्दैनथ्यो। माओवादी केन्द्रले उपराष्ट्रपति पनि पाउँथ्यो। माओवादी केन्द्रले नेकपा (एमाले) को समर्थनमा पाँचै वर्ष प्रधानमन्त्री पनि पाउँथ्यो। ल्याप्चे, तमसुक, कालो दलेर जे जे गरिदिनुपर्ने हो उठेर, बसेर सबै गरिदिन्थ्यो। सबै कुरा पाउँथ्यो’, उनले भने, ‘बरु प्रधानमन्त्री हुने कुरा तलमाथि भए होस्, तर जुन उद्देश्यका साथ गठबन्धन बनाइयो त्यो गठबन्धन फेरि ब्युतन्छ र फर्कन्छ भने म त्यो जोखिम उठाउन तयार छु भन्ने कुरा माओवादी केन्द्रका अध्यक्षले त्यो कुरालाई नमानेको भए, त्यो कुरा गर्न तयार नभएको भए यो बाटो अगाडी बढ्ने अवस्था बन्दैनथ्यो।’
‘माधवकुमार नेपाललाई यतिखेर नेकपा (एमाले) ले मिलाएर राष्ट्रपति बनाउने कुरा मात्रै होइन यो बेलामा अन्तिम अन्तिममा मेरो अनुमान माधवकुमार नेपाललाई नेकपा (एमाले) को अध्यक्ष नै बनाइदिनुपर्छ भनेको भए पनि ल हुन्छ भन्ने अवस्था बन्थ्यो होला। माधवकुमार नेपाल त्यो सबैकुरा छोडेर आउन तयार नभएको भए यो अवस्था बन्दैनथ्यो,’ उनले अगाडि भने।
त्यस्तै कार्यक्रममा बोल्दै नेकपा (माओवादी केन्द्र) वागमती प्रदेश सभा संसदीय दलका नेता समेत रहेका वागमती प्रदेशका मुख्यमन्त्री शालिकराम जम्कट्टेलले माओवादी केन्द्रका सबै वागमती प्रदेश सभा सदस्यहरुको मत राष्ट्रपतिको उम्मेदवार रामचन्द्र पौडेललाई जाने प्रतिवद्धता व्यक्त गरे। उनले आठ दलले गरेको निर्णय माओवादी केन्द्र प्रदेश सभाले अक्षरश पालना गर्ने बताए।
