नेकपा एमालेको भ्रातृ संगठन अनेरास्ववियुको २३ औं राष्ट्रिय महाधिवेशनबाट अध्यक्षमा समिक बडाल निर्वाचित भएका छन्।
अनेरास्ववियुको पदाधिकारी र केन्द्रीय कमिटीमा सहमति हुन नसकेपछि बिहीबार मतदान गरिएको थियो।
गए राति मतगणना गरिएकोमा अध्यक्षमा बडाल विजयी भएको नेता सन्तोष राना क्षेत्रीले सेतोपाटीलाई जानकारी दिए।
बडालले ९६२ मत ल्याएर निर्वाचित भएका हुन्। बडाल अनेरास्ववियुका निवर्तमान महासचिव हुन्। उनी काभ्रेको रोसी गाउँपालिका वडा नम्बर ९ का हुन्।
बडालले अध्यक्षका उम्मेदवारहरू आरसी लामिछाने, मोती विक, लोकेश निरौला र वाङ्छु योञ्जनलाई हराएका हुन्। आरसीले ३५६ मत ल्याए, लोकेशले ११३ मत र वाङ्छुले ८ मत मात्रै ल्याएका थिए।
उपाध्यक्षमा गोविन्द गिरीले ७६३ मत, धर्म गिरीले ५०१ मत, नारायण घर्तीले ७५१ मत र मर्यादा विष्टले ६७५ मत ल्याएर निर्वाचित भएका छन्।
महासचिवमा नरेश रोकाया ७३३ मत ल्याएर विजयी हुँदा अरू उम्मेदवार उमेश आचार्य, कल्पना वाइवा, भाष्कर खनाल, सुदर्शन शिवाकोटी पराजित भएका छन्।
सचिवमा सञ्जिव धितालले २८८ मत, सुजन कडरियाले ६१७ मत, प्रकाश पौडेलले ५२८ मत, दिपेश प्रसाईले ३३३ मत, आशिर्वाद सुवेदीले ३४६ मत र दीपक धामीले ३५० मत ल्याएर निर्वाचित भए।
यस्तै सचिवमै अञ्जना शिवाकोटीले ७५९ मत, आरती भट्टराईले ५२५ मत, विनिता काफ्लेले ५३५ मत, मनोज ताम्ली लिम्बूले ४५७ मत ल्याएर निर्वाचित भएका छन्।
यस्तै कोषाध्यक्षमा संगम अर्याल निर्वाचित भएका छन्। उनले ७२० मत ल्याए। अधिवेशनमा एक हजार पाँच सय १७ जनाले मतदान गरेका थिए।
महाधिवेशनले आगामी २ वर्षका लागि १७ पदाधिकारीसहित १९९ सदस्यीय केन्द्रीय कमिटी चयन गरेको छ।
साथै अनुशासन, लेखा र निर्वाचन आयोगमा पनि पदाधिकारी निर्वाचित भएका छन्।
