नेपाली कांग्रेसले सभामुख निर्वाचनमा पार्टीकी उम्मेदवार ईश्वरीदेवी न्यौपानेका पक्षमा मतदान गर्न ह्वीप जारी गरेको छ।
मुख्यसचेतक रमेश लेखकले बुधबार अपरान्ह ह्वीप जारी गर्दै सभामुखमा न्यौपानेलाई मत दिन र नेकपा एमालेका उम्मेदवार देवराज घिमिरेलाई मत नदिन ह्वीप जारी गरेका हुन्।
बिहीबार बिहान ११ बजे बस्ने प्रतिनिधि सभा बैठकमा सभामुख चयनबारे मतदान हुँदैछ।
‘प्रतिनिधि सभामा नेपाली कांग्रेसका सदस्यहरुलाई अनिवार्य उपस्थित हुन, तटस्थ नरहन र ईश्वरीदेवी न्यौपानेलाई सभामुख पदमा निर्वाचित गरियोस् भन्ने प्रस्तावको पक्षमा मतदान गर्न र देवराज घिमिरेलाई सभामुख पदमा निर्वाचित गरियोस् भन्ने प्रस्तावको विपक्षमा मतदान गर्न कांग्रेस संसदीय दलका प्रमुख सचेतक रमेश लेखकले व्हीप जारी गर्नु भएको छ,’ संसदीय दलका अधिकृत विजयेन्द्रवीर आलेले जारी गरेको विज्ञप्तिमा भनिएको छ।
सभामुखमा कांग्रेसले एकीकृत समाजवादीलगायत दलको समर्थनमा न्यौपानेलाई उम्मेदवार बनाएको छ। प्रतिनिधि सभामा कांग्रेसका ८९ जना सांसद छन्। मनाङबाट निर्वाचित सांसद टेकबहादुर गुरूङ भने प्रतिनिधि सभामा उपस्थित हुन पाउँदैनन्। उनीविरूद्ध भ्रष्टाचार मुद्दा विचाराधीन छ।
