पुष्पकमल दाहाल ‘प्रचण्ड’ नेतृत्वको सरकारलाई विश्वासको मत दिने कि नदिने भन्नेबारे दुई धारमा बाँडिएको नेपाली कांग्रेसले सोमबार नयाँ प्रतिनिधि सभाको पहिलो बैठकमा नेकपा (एमाले) का अध्यक्ष केपी शर्मा ओलीले गरेको भाषणको विषयवस्तुलाई गम्भीर रूपमा लिएको छ।
सोमबार संसदमा सम्बोधन गर्दै ओलीले आफू प्रधानमन्त्री हुँदा दुई पटक गरेको संसद विघटनको प्रतिरक्षा गरेका थिए।
उनले भनेका थिए- प्रतिनिधि सभा भंग हुनु प्रतिगमन होइन। संसदबाट सरकार बन्नु र संसदबाट सरकार ढल्नु प्रतिगमन होइन। अन्यत्र लगेर षड्यन्त्रबाट सरकार ढाल्नु प्रतिगमन हो।
सर्वोच्च अदालतले ओलीले गरेको प्रतिनिधि सभा विघटन असंवैधानिक भन्दै दुई पटक पुनर्स्थापित गरिदिएको थियो। उक्त संसदको कार्यकाल सकिएर नयाँ प्रतिनिधि सभा आइसकेपछि ओलीले पहिलो दिनमै गरेको उक्त भाषणले आफूलाई गम्भीर बनाएको कांग्रेस महामन्त्री गगन थापाले सोमबार नै बताएका थिए।
थापाले भनेका थिए- पूर्वप्रधानमन्त्री ओलीले हालको प्रधानमन्त्रीलाई एउटा अवस्थामा भने बडो अप्ठेरोमा पारेको मैले याद गरें। प्रतिनिधि सभा विघटन गरेको कुरा सोह्रै आना सत्य थियो, त्यो जनताको पक्षमा थियो र त्यसलाई प्रतिगामी भन्नेहहरू नै प्रतिगामी हुन् भन्दै गर्दा हालका प्रधानमन्त्री टेबल ठोकौं कि नठोकौं भनेर अलमलमा परेको देख्दा मलाई अलिकति सहानुभूति लाग्यो। यो हेर्दा सामान्य अलमल देखिएता पनि यसलाई मैले सामान्य अलमल मानेको छैन।
संसद विघटनको मुद्दा पहिला प्रचण्ड र ओली विग्रहको कारण बनेको उल्लेख गर्दै थापाले यही विषय फेरि बिजारोपण भएको बताए।
‘यो विषयको हल नगरीकन, यो विषयबारे एकपटक पनि छलफल नगरीकन, सामान्य समीक्षा पनि नगरीकन दुइटा पार्टी जोडिएका छन्। यो विषय नै फेरि उहाँहरूबीच विग्रहको कारण बन्छ,’ थापाले भने, ‘किनकी यो विषय हेर्दा सामान्य देखिए पनि नेपालको संविधानलाई कसरी लिने, संवैधानिक व्यवस्थालाई कसरी लिने भन्ने मूलभूत विषय हुन्। यी विषयहरू केही पनि होइनन् भने अघिल्लो पटक संसद कसरी विघटन भयो? यसको उत्तर के हो?’
ओलीले गरेको उक्त भाषणको चर्चा मंगलबार बिहान बसेको कांग्रेस पदाधिकारी बैठकमा पनि भयो।
कांग्रेसका एक पदाधिकारीले दिएको जानकारीअनुसार सत्ता साझेदार दल नेकपा एमालेका अध्यक्ष केपी शर्मा ओलीले सोमबार प्रतिनिधि सभामा गरेको सम्बोधनका केही विषयले कांग्रेसलाई झस्काएको छ।
ओलीले संसद विघटन गर्नु प्रतिगमन नभएको बताएका थिए। ओलीको यो कुराबारे धुम्बाराहीमा सोमबार साँझ प्रधानमन्त्री प्रचण्ड र देउवाबीच भएको भेटवार्तामा पनि प्रसंग उप्किएको थियो।
‘केपी ओलीले संसदमा उभिएर जे बोल्नुभयो, त्यो कुरालाई कांग्रेसले गम्भीरतापूर्वक लिएको छ,’ ती नेताले भने, ‘ओलीले प्रतिनिधि सभामा उभिएर संसद विघटनलाई सही ठहर्याउने गरी बोल्नुभयो। जब कि नेपालको सर्वोच्च अदालतले दुई पटक नै संसद विघटन गलत भनिसकेको हो।’
ओलीले बोलेका विषयबारे प्रधानमन्त्री प्रचण्डको धारणा पनि आफूहरूले सुन्न चाहेको ती नेता बताउँछन्।
‘केपी ओलीले बोलेको कुरालाई कांग्रेसले एकमतले गम्भीरतापूर्वक लिएको छ। ओलीले आफू उच्चस्तरीय समिति संयोजक पनि भन्नुभयो,’ ती नेताले भने।
