नेपाली कांग्रेसका सांसद अर्जुननरसिंह केसीले कांग्रेसले संसदमा सशक्त प्रतिपक्षको भूमिका निर्वाह गर्ने बताएका छन्।
सोमबार प्रतिनिधि सभाको बैठक अघि सञ्चारकर्मीलाई संक्षिप्त प्रतिक्रिया दिँदै उनले काँग्रेसले संसदमा सशक्त र रचनात्मक प्रतिपक्षको भूमिका खेल्ने बताए।
उनले जनताको सरोकारका विषयलाई केन्द्रमा राखेर संसदमार्फत् सरकारलाई निर्देशन दिने पनि जानकारी दिए। उनले संसदलाई वास्तविक रूपमा जनप्रतिनिधिको संस्थाको रूपमा विकसित गर्न आफूहरुको भूमिका हुने बताए। उनले कांग्रेसले वर्तमान सरकारलाई विश्वासको मत नदिने स्पष्ट पारे।
‘कांग्रेसको भूमिका लोकतान्त्रिक सशक्त प्रतिपक्ष, रचनात्मक प्रतिपक्ष, नेपाली जनताका सरोकारसँग प्रत्यक्ष सम्बन्ध हुनेकुरा विषयलाई केन्द्रित गरेर हामी संसदमार्फत सरकारलाई निर्देशन र नियन्त्रित गर्ने । संसदलाई सक्षम र वास्तविक रुपबाट सार्वभौम सत्ता जनताको प्रतिनिधिको रुपमा विकसित गर्न खोज्छौँ । हाम्रो भूमिका प्रमुख प्रतिपक्षको रुपबाट सशक्त, जीवन्त र प्रभावकारी भूमिका गर्छौं । सरकारलाई विश्वासको मत दिने निर्णय छैन । दिनुहुँदैन,’ उनले भने।
राष्ट्रिय प्रजातन्त्र पार्टीका अध्यक्ष तथा सांसद राजेन्द्र लिङदेनले राप्रपाले राष्ट्रियता, सुशासन, विकास र सेवा प्रवाहको विषयलाई संसदमा सशक्त ढंगले उठाउने बताए। सबै दलहरुबीच एक अर्कालाई सम्मान गरेर जानुपर्ने जनताको म्याण्डेट रहेकाले सोही अनुरूप संसद चल्नुपर्ने उनले बताए।
उनले संसदमा कुनैपनि एउटा राजनीतिक दलको बहुमत नभएकाले देशलाई निकास दिनका लागि राप्रपा सत्ता गठबन्धनमा सामेल भएको स्पष्ट पारे। ‘अहिले संसदमा कुनै पनि एउटा राजनीतिक दलको बहुमत छैन। कुनै पनि राजनीतिक दललाई एकल रूपमा जनताले विश्वास गरेको अवस्था छैन। सबै राजनीतिक दलहरुलाई मिलेर जानुपर्ने र सबै विचारलाई एकले अर्कोलाई सम्मान गरेर, समेटेर लैजानुपर्ने जनताको म्याण्डेड छ र त्यही बमोजिम अहिलेको संसद अगाडि बढ्नुपर्दछ’, उनले भने, ‘राष्ट्रियता, राष्ट्रिय एकता, सुशासन, विकास र सेवा प्रवाहसँग सम्बन्धित विषयहरुमा हामीले सशक्त ढंगले भूमिका निर्वाह गर्छौं । चाहे सरकारमा बसेर होस् चाहे प्रतिपक्षमा बसेर होस् । देशलाई निकास दिने योजनाकार राप्रपा पनि हो । हामीले अहिले विकासको एजेण्डा कार्यान्वयन गर्छौ । जनताको सुख, सुविधाको कुरा गर्छौ । राष्ट्रियतालाई मजबुत गर्ने कुरा गर्छौं।’
नागरिक उन्मुक्ति पार्टीकी अध्यक्ष तथा सांसद रञ्जिता श्रेष्ठ चौधरीले सरकारलाई आफ्नो पार्टीले विश्वासको मत दिने बताइन्। ‘विश्वासको मत पक्कै पनि दिनेछौँ । हामीले प्रधानमन्त्रीजीलाई राष्ट्रपतिसमक्ष समर्थन गरेर गइसकेपछि हामीले प्रधानमन्त्रीजीलाई विश्वासको मत दिनेछौँ,’ उनले भनिन्।
जनमत पार्टीका अध्यक्ष तथा सांसद चन्द्रकान्त राउतले आफूहरुले शिक्षा, स्वास्थ्य, रोजगारी र किसानका मुद्दालाई प्राथमिकतामा राखेर संसदमा प्रस्तुत हुने बताए। उनले देशलाई दुई वर्षभित्र पूर्ण साक्षर बनाउने र विद्यार्थीहरुलाई सर्वसुलभ शिक्षा दिलाउनुपर्ने बताए।
त्यस्तै किसानले समयमै मलखाद र किसान कार्ड पाउनुपर्नेमा जोड दिने उनको भनाई छ। राउतले नागरिक उन्मुक्ति पार्टीसँग आफूहरुको धेरै एजेण्डा मिल्ने भएकाले कार्यगत एकता गरेको उल्लेख गरे। सो कार्यगत एकता भविष्यमा पार्टी एकताकै तहसम्म जाने पनि बताए।
‘हामी शिक्षा, स्वास्थ्य, रोजगारी र किसानका मुद्दाहरुलाई प्राथमिकतामा राखेर अगाडी बढेका छौँ। सरकारको साझा नीति, कार्यक्रम पनि आएको छ, दुई वर्ष भित्रमा देशलाई नै पूर्ण साक्षर घोषणा गर्ने नीति लिइएको छ। त्यसलाई प्रभावकारी साथ अगाडी बढाउने र देशलाई पूरै साक्षर बनाउने । हाम्रो पार्टीको लक्ष्य विद्यार्थीहरुलाई सर्वसुलभ शिक्षा र गुणस्तरीय शिक्षा पाउन सकुन्’, उनले भने, ‘किसानले समयमा मलखाद पाउनुपर्यो । किसान कार्ड पाउनुपर्यो । बालिको समर्थन मूल्य समयमा तोकिनुपर्यो । यही कुराहरु हुन् । एजेण्डाहरु धेरै समान छन् । दुवै नयाँ पार्टीको रुपमा उदय भएका हौँ । जनताको ठुलो आशा हामीसँग छ । त्यो भएर हामी एक भएर अगाडि बढ्नसक्यौँ भने माग पूरा गर्न सहज हुन्छ भनेर हो । पार्टी एकताकै तहसम्म जानसक्छ ।’
स्वतन्त्र रुपमा निर्वाचित सांसद अमरेशकुमार सिंहले आफूले संसदमा सुशासनको कुरा उठाउने बताए। उनले अर्थतन्त्र कमजोर भएकाले अर्थतन्त्रलाई सुचारु गर्ने सम्बन्धमा पनि संसदमार्फत झक्झकाउने बताए।
नेपालीहरुलाई विदेशिनबाट रोक्ने अवस्था बनाउन आफूले प्रयास गर्ने उनको भनाई छ। ‘देशमा सुशासनको समस्या छ । अर्थतन्त्र कमजोर बन्दै गएको छ । अर्थतन्त्रलाई कसरी सुचारु गर्ने, युवाहरुलाई कसरी यही देशमा रोजगारीको सिर्जना गर्ने । किनकी यो देश न हुँदा खानेको छ, न हुने खानेको छ । हुनेखाने अष्ट्रेलिया, अमेरिका युरोप जान्छन् । हुँदा खाने पनि मलेसिया, कतार, साउदी जान्छन् । दुईटैलाई यही देशभित्र कसरी बस्ने अवस्था मिल्छ, त्यसको निम्ति म निरन्तर प्रयास गर्छु,’ उनले भने।
नेकपा (माओवादी केन्द्र) का सांसद लेखनाथ दाहालले नीति निर्माणको तहमा देखिएका समस्या समाधानका लागि आफ्नो भूमिका हुने बताए। उनले देशको विकास र समृद्धिका लागि भएका नीतिगत समस्याहरुको गाँठो फुकाउन आफू क्रियाशिल हुने बताए।
‘नीति निर्माणको तहमा देखिएका मुलभुत समस्याहरु हल गर्न मेरो प्रभावकारी भूमिका हुनेछ । समग्र मुलुकको विकास, समृद्धिको नेतृत्व गर्ने प्रक्रियामा नीतिगत समस्याहरु के–के छन्, नीतिगत समस्याहरुको गाँठो फुकाउने कुरा र विकास समृद्धिमा हाम्रो प्रभावकारी भूमिका निर्वाह गर्ने कुरामा कुनै कमि हुनेछैन,’ उनले भने।
राष्ट्रिय प्रजातन्त्र पार्टीका सांसद ज्ञानबहादुर शाहीले विगतको गठबन्धन तोडेर नयाँ गठबन्धन बनाउन राप्रपा सफल भएको बताए। उनले आफूहरुले सरकारको समर्थन गरे पनि गलत कुरा भएमा त्यसको बिरोध गर्ने बताए। उनले राप्रपाले आफ्नो एजेण्डा र मूल्य, मान्यताहरुलाई नत्यागेको बताए।
