नेकपा एमालेका उपाध्यक्ष एवं रूपन्देही क्षेत्र नम्बर २ बाट प्रतिनिधि सभा सदस्यका लागि उम्मेदवार रहेका विष्णु पौडेलले कुनै पनि पार्टी र उम्मेदवारको आलोचना नगरी आफ्ना पार्टीका विचार बोकेर जनताको बीचमा पुगेको बताएका छन्।
बुटवलमा पत्रकारहरूसँग संक्षिप्त कुरा गर्दै पौडेलले एमालेका उम्मेदवार र नेता कार्यकर्ताका अगाडि पर्याप्त एजेन्डाहरू रहेकाले तिनै एजेन्डासहित जनताको घरघरमा पुगिरहेको बताए।
'निर्वाचनका बेला एकअर्काप्रति गरिने निकृष्ट टिकाटिप्पणी र गालीगलौजले स्वयं आफ्नै कद घटाउँछ,' उनले भने।
कसैप्रति दुर्भावना नराखी आफूले गरेका राम्रा कामको जानकारी, पार्टीका भावी योजना र विचार बोकेर जनताका बीचमा जान नेता तथा कार्यकर्तालाई उनले सुझाव पनि दिए।
आफ्नो स्वभाव नै अरूलाई गालीगलौज गर्ने नभएको भन्दै उनले अरू नेता-कार्यकर्तालाई पनि सोही अनुसारको व्यवहार गर्न सुझाव दिए।
बुटवल र समग्र रूपन्देहीको विकासका लागि कसले के योगदान गरेको छ भन्नेतर्फ बुटवलका जनता जानकार रहेकाले सोही अनुसारको नेतृत्व चयन गर्ने आफू विश्वस्त रहेको पनि पौडेलको भनाइ छ।
