पूर्वराज्यमन्त्री पुष्करनाथ ओझाले प्रतिनिधि सभा सदस्यका लागि स्वतन्त्र उम्मेदवारी दिने घोषणा गरेका छन्।
धनगढीमा शुक्रबार दिउँसो पत्रकार सम्मेलन गर्दै ओझाले कैलाली-५ मा स्वतन्त्र उम्मेदवारी दिने घोषणा गरेका हुन्।
‘झोलाभरि पैसा बोकेर धनगढी आए पार्लियामेन्टमा जान सकिन्छ भन्ने कुरा तोड्न र धनगढीका मतदाता बिकाउ छैनन् भन्ने देखाउन स्वतन्त्र रूपमा चुनाव लड्ने घोषणा गरको छु,’ उनले भने।
स्वतन्त्रता र दलीय व्यवस्था स्थापना गर्न संघर्ष गरे पनि अहिले आएर आफैं दलबिहीन हुनुपर्दा दुःख लागेको ओझाले बताए।
पार्टीले निष्कासन गरे पनि कुनै प्रतिक्रिया नदिएको तर अहिले अप्रिय भए पनि कठोर निर्णय लिनुपरेको पनि उनले बताए।
नेतृत्वमा पुगेपछि परिवारलाई मात्रै हेर्ने पार्टीको व्यवहारको प्रतिक्रिया र धनगढीका मान्छेको आत्मसम्मानका लागि नै मेरो उम्मेदवारी हो,’ उनले भने।
ओझाले कांग्रेसको तर्फबाट आधिकारिक उम्मेदवार जो भए पनि कांग्रेसीले आफूलाई नै भोट दिने पनि दाबी गरे। अब कांग्रेसकै उम्मेदवार बन्न भने पनि पछाडि नफर्किने ओझाको भनाइ छ।
‘मनोनयन फारम भर्दासम्म पनि पाँच मिनेट कांग्रेसलाई कुर्छु भन्ने सोच थियो। तर अब समय बाँकी रहेन,’ उनले भने।
२०७४ सालको प्रतिनिधि सभा चुनावमा आकांक्षी रहेका ओझा कांग्रेस सभापति शेरबहादुर देउवाले पत्नी आरजु राणालाई टिकट दिएपछि रुष्ट बनेका थिए। नेकपा एमालेका नारदमुनी रानासँग आरजु राणा पराजित भएपछि चुनावमा असहयोग गरेको भन्दै नेपाली कांग्रेसले ओझालाई कारबाही गरेको थियो।
