प्रतिनिधि सभा बैठकमा नेकपा एमालेले कमेडियन अपूर्व क्षितिज सिंह रिहाई गर्न माग गरेको छ।
बुधबारको बैठकमा प्रमुख प्रतिपक्षी दल नेकपा (एमाले)का प्रमुख सचेतक विशाल भट्टराईले कलाकार अपूर्व क्षितिज सिंहले व्यंग गरेर आफ्नो कला प्रस्तुत गरेबापत जेल जानुपरेको उल्लेख गर्दै तत्काल रिहाईको माग गरेका छन्।
सांसद भट्टराईले अपूर्वमाथि कुनै खालको अत्याचार नगर्न पनि सचेत गराए।
‘अपूर्व क्षितिज सिंह जस्तो कलाकारलाई १० औं दिनदेखि थुनामा राख्ने काम यो सरकारले गरिरहेको छ। म उहाँलाई सिघ्र रिहाइको माग गर्न चाहान्छु,’ उनले भने, ‘उहाँले यसअघि नै आफ्नो पोष्टबाट डिलिटमात्रै गर्नुभएको छैन। क्षमायाचना पनि गर्नुभएको छ। उहाँलाई थुनेर कुनै पनि खालको अत्याचार नगरियोस् र कलाकारमाथि कुनै खालको दमन नगरियोस्।’
कमेडियन अपूर्व भदौ १२ गतेदेखि प्रहरी हिरासतमा छन्। उनीविरूद्ध नेवा समुदायका अभियन्ताहरूले प्रहरीमा जाहेरी दिएका थिए।
सासंद भट्टराईले संस्कृति, पर्यटन तथा नागरिक उड्डयन मन्त्री जीवनराम श्रेष्ठमाथि पनि व्यंग्य गरेका छन्।
‘हुन त यो मुलुकमा मन्त्रीलाई यसो कर्के नजर लगाएर हेर्यो भने सुरक्षागार्ड पक्राउ पर्ने देश हो। अहिले त्यो खालका मन्त्रीहरू सत्तामा आसिन हुनुहुन्छ। अब भनौं भने के भनौं। मन्त्रीजीलाई अलिकति आलोचना गर्यो भने पनि पक्राउ पर्ने स्थिति छ,’ उनले भने।
उनले शीर्ष नेताहरूमाथि पनि व्यंग्य गर्ने चलन रहेको सम्झाउँदै अपूर्वलाई थुन्नु गलत हुने स्पष्ट पारे।
‘उहाँले कला प्रस्तुत गर्ने क्रममा केही कसैलाई मर्का पर्यो होला। कसै न कसैलाई मर्का पार्ने नै हुन्छ हाँस्य कलाकारमा। शीर्ष नेताहरू प्रज्ञा भवन र सभा गृहमा बसेर हाँस्य कलाकारहरूको आफूमाथिको कडा व्यंग्य हाँसिहाँसी स्विकार गरेको देखिरहेका छौं,’ उनले भने।
१० दिन देखि हिरासतमा रहेका अपूर्वलाई थप हिरासतमा राख्ने प्रहरीको तयारी छ। उनीमाथिको अनुसन्धान नसकिएको भन्दै प्रहरीले म्याद थप गर्न लागेको हो।
