वैदेशिक सहयोगमा सञ्चालित विकास आयोजना र त्यहाँ कार्यरत् कर्मचारीहरूलाई धम्कीपूर्ण अभिव्यक्ति दिइएको भन्दै गृह मन्त्रालयले आपत्ति जनाएको छ।
शुक्रबार गृह मन्त्रालयले विज्ञप्ति जारी गर्दै विकास आयोजना कार्यान्वयनमा असुरक्षा महसुस हुने तथा वैदेशिक सम्बन्धमा नै आँच आउने गरी कुनै गतिविधि नगर्न नगरउन मन्त्रालयले अनुरोध गरेको छ।
विगत केही समययता वैदेशिक सहयोगमा सञ्चालित आयोजना, कर्मचारी, विदेशी नागरिक र तिनको सम्पत्तिलाई लक्षित गरी प्रत्यक्ष-परोक्ष रुपमा सञ्चारमाध्यम, सामाजित सञ्जालमा नकारात्मक टिप्पणी गर्ने, धम्कीपूर्ण अभिव्यक्ति दिने गरिएको गृहको दाबी छ।
त्यस्ता अभिव्यक्ति र गतिविधिहरूको सूक्ष्म रुपमा निगरानी राख्ने, विश्लेषण गर्ने र त्यस्ता गतिविधि गर्नेउपर प्रचिलित कानुन बमोजिम कारबाही गर्ने मन्त्रालयले चेतावनी दिएको छ।
