नेपाल कम्युनिष्ट पार्टीले आफ्नो नाम दुरूपयोग गर्दै प्रगतिशील मोर्चा मध्यपूर्वको संयोजक बनेका बेद बोहराप्रति ध्यानाकर्षण भएको जनाएको छ।
बुधबार नेपाल कम्युनिष्ट पार्टीका विदेश विभाग प्रमुख कञ्चनले एक विज्ञप्ति जारी गर्दै बोहोराले जनप्रगतिशील मोर्चा मध्यपूर्वको संयोजक बनी नेपाल कम्युनिष्ट पार्टी र यसका समर्थक व्यक्तिहरूविरुद्ध कुप्रचार गरिरहेको र त्यसमा आफ्नो पार्टीको ध्यानाकर्षण भएको जनाएका छन्।
‘पार्टी र क्रान्तिविरुद्ध अनेक प्रकारको भ्रम सृजना गर्ने, अनुशासनहिनतालाई बढावा दिने, अराजकता उत्पन्न गर्ने र फुट पैदा गर्ने षड्यन्त्रको कडिका रुपमा यो घटना जोडिएको छ’, विज्ञप्तिमा भनिएको छ।
विदेशमा रहेर नेपालीहरू माझ चलिरहेको वैज्ञानिक समाजवादी क्रान्ति, त्यो पार्टीले गरेका जनसेवाका कामहरूमा समस्त क्रान्तिकारी र प्रगतिशील नेपालीहरूले आफ्नो क्षमता अनुसार सहयोग गरेको र गरिरहेको तथ्य सर्वविदितै रहेको भन्दै कञ्चनको हस्ताक्षरित विज्ञप्तिमा भनिएको छ, ‘यो अभियान चलाउने नेपाली विरुद्ध अनर्गल प्रचार गर्ने, सामाजिक सहयोग भाड्ने, पार्टीका नेता कार्यकर्तालाई बदनाम गर्ने, सामाजिक सञ्जाल दुरुपयोग गर्ने नक्कली नामबाट सक्रिय यो गिरोहबाट सतर्क र सजग रहन सबैमा अपिल गरिन्छ। अझ आपत्तिजनक कुरा त के छ भने नेपालमा नेपाल कम्युष्टि पार्टीको नाम दुरुपयोग गरी भूमाफियासँग कमिशन खाँदै संघर्षलाई कमजोर पार्ने बदनामहरू समेत यो गिरोहसँग संलग्न भएको देखियो।’
जनसेवा र क्रान्ति विरोधि यी सबै तत्वसँग देश र विदेशमा रहेका सबै नेपाली सचेत रहन उनले आग्रह गरेका छन्। ‘उपर्युक्त व्यक्ति र त्यसको पछि भागेका कोही पनि व्यक्तिहरू पार्टी सदस्य नरहेको र यसका आसपास हुने कोही पनि व्यक्ति पार्टी सदस्य हुन नसक्ने व्यहोरा पनि स्पष्ट गरिन्छ’, विज्ञप्तिमा भनिएको छ।
![](https://www.setopati.com/uploads/editor/2021-02-18/236442912_183499117069583_1549393973379775884_n.jpg)