नेकपा एमालेको पार्टी एकताबारे उपाध्यक्ष भीम रावल र महासचिव ईश्वर पोखरेलबीच छलफल भएको छ।
टोखास्थित पोखरेल निवासमा आइतबार भएको भेटमा १० बुँदे सहमति कार्यान्वयन गरेर पार्टी एकता गर्नेबारे छलफल भएको बताइएको छ।
एमाले अध्यक्ष केपी शर्मा ओली र वरिष्ठ नेता माधव नेपाल पक्षका कार्यदलबीच गत असार २७ गते १० बुँदे सहमति भएको थियो। उक्त १० बुँदे सहमतिलाई वरिष्ठ नेता नेपालले नस्वीकारेकाले अझै कार्यान्वयन हुन सकेको छैन।
पार्टी अध्यक्ष ओली र वरिष्ठ नेता नेपालबीचको शक्ति बाँडाफाट स्पष्ट हुनुपर्ने अडान नेपाल पक्षको छ।
नेपाललाई दोस्रो अध्यक्ष बनाउन ओली तयार भए पनि बराबरी हैसियत दिन भने तयार भएका छैनन्। महाधिवेशनबाट निर्वाचित अध्यक्षकै बराबरी हैसियत पाउन सम्भव नभएको ओली पक्षले स्पष्ट पारेको छ।
