जनता समाजवादी पार्टी नेपालका नेता मोहम्मद इस्तियाक राईले निर्वाचन आयोगबाट पार्टी आधिकारिकताको टुंगो आजै लाग्ने बताएका छन्।
निर्वाचन आयोगमा पत्रकारहरूसँग कुराकानी गर्दै राईले एक/दुई दिनमा सरकारमा सहभागी हुने पनि बताए।
‘आज आधिकारिकताको टुंगो लाग्छ। एक/दुई दिनमा सरकारमा जान्छौं,’ उनले भने। आयोगले जसपा विवादको मुद्दा आजै इजलासमा पेश गर्ने र आधिकारिकताबारे निर्णय गर्ने बताएको उनले जानकारी दिए।
आफूहरूको पक्षमा ३३ जना केन्द्रीय कार्यकारिणी समिति सदस्य रहेको उनको दाबी छ। जसपामा ५१ जना केन्द्रीय कार्यकारिणी समिति सदस्य छन्।
उनले पार्टीका केही नेता नेकपा एमालेका अध्यक्षसमेत रहेका निवर्तमान प्रधानमन्त्री केपी शर्मा ओलीसँग मिलेर प्रतिगमन गरेको आरोप लगाए।
उनले दुई तिहाइसहित आफूहरूका पक्षमा जसपाले आधिकारिकता पाउने पनि दाबी गरेका छन्। उनले ‘प्रतिगमनकारीहरू आजबाट पार्टीबाट अन्यत्र जाने’ पनि बताए।
आज निर्वाचन आयोगमा अध्यक्षद्वय महन्थ ठाकुर र उपेन्द्र यादव पक्षका नेता आधिकारिकताका लागि हस्ताक्षर गर्न पुगेका छन्।
उपेन्द्र यादवका पक्षमा धेरै केन्द्रीय कार्यकारिणी समिति सदस्य देखिएका छन्।
