प्रधानमन्त्री शेरबहादुर देउवाले विश्वासको मत लिने तयारी गरेपछि पोखरामा रहेका सांसद गगन थापा हेलिकप्टरमार्फत् काठमाडौं आएका छन्।
कांग्रेस नेता रामजी कुँवरको स्मृति सभाका लागि पोखरामा रहेका थापा आज प्रधानमन्त्री देउवाले विश्वासको मत लिने भएपछि काठमाडौं आएका हुन्।
उनी सडकमार्गबाट काठमाडौं आउँदै थिए। पोखराबाट पृथ्वीराजमार्ग हुँदै काठमाडौं आइरहे पनि पहिरोका कारण उनी दमौलीमा रोकिएका थिए।
थापा हेली एभरेष्टमार्फत् काठमाडौं आएको थापाको सचिवालयले जनाएको छ। थापासँगै पूर्वमन्त्री यज्ञबहादुर थापा पनि छन्।
आज बस्ने प्रतिनिधि सभा बैठकमा प्रधानमन्त्री देउवाले विश्वासको मतका लागि प्रस्ताव राख्दैछन्।
आज अपरान्ह ४ बजे प्रतिनिधि सभा बैठक बस्दैछ।
गगनलाई महामन्त्री बनाउने अभियानमा छौं: थापा
दमौलीमा रहँदा सांसद गगन थापा र पूर्वमन्त्री यज्ञबहादुर थापा महिला संघको कार्यक्रममा सहभागी भएका थिए। उक्त कार्यक्रममा बोल्दै पूर्वमन्त्री थापाले गगन थापालाई १४ औं महाधिवेशनबाट महामन्त्री बनाउने अभियानमा आफूहरू लागेको बताएका थिए।
कांग्रेसको महाधिवेशन भदौ १६ देखि १९ गतेसम्म काठमाडौंमा हुँदैछ।
