भदौमा हुने नेपाली कांग्रेसको महाधिवेशनका लागि सभापतिको उम्मेदवार कसलाई बनाउने भन्ने सहमति जुटाउन वरिष्ठ नेता रामचन्द्र पौडेल पक्षले छलफल सुरू गरेको छ।
संस्थापन पक्षबाट सभापति शेरबहादुर देउवा फेरि सभापतिमा उठ्ने तयारी गरिरहेका छन् भने उपसभापति विमलेन्द्र निधि पनि सभापतिका लागि तयारी गरिरहेका छन्।
यसैबीच पौडेल पक्षबाट पौडेलसहित महामन्त्री शशांक कोइराला, पूर्वमहामन्त्री प्रकाशमान सिंह, नेताहरू शेखर कोइराला र सुजाता कोइराला पनि सभापतिका लागि दाबी प्रस्तुत गरिरहेका छन्।
१३ औं महाधिवेशनमा सभापति उठेर पछि देउवालाई सघाएका पूर्वमहामन्त्री कृष्णप्रसाद सिटौला पनि सभापतिका लागि तयारी गरिरहेका छन्।
यस्तो बेला पौडेल पक्षबाट एक मात्र सभापतिको उम्मेदवार बनाउनका लागि छलफल सुरू भएको छ। यसको नेतृत्व भने केन्द्रीय सदस्य अर्जुननरसिंह केसीले गरेका छन्। उनकै संयोजनमा शुक्रबार अपरान्ह अनुपम फुडल्याण्ड बत्तिसपुतलीमा छलफल सुरू भएको छ।
छलफलमा पौडेल पक्षबाहेक पूर्वमहामन्त्री सिटौलालाई पनि खबर गरिएको छ। केसीको स्वकीय सचिव निराजन थापाका अनुसार भर्खरै बैठक सुरू भएको छ।
छलफलका लागि केसीले महामन्त्री कोइराला, केन्द्रीय सदस्यहरू बलबहादुर केसी, रामशरण महत, शेखर कोइराला र सुजाता कोइरालालाई पनि बोलाएका छन्।
सभापतिका आकांक्षीहरूबीच छलफल गरी एक जना उम्मेदवार बनाउने तयारी रहेको एक नेताले बताए। देउवाविरूद्ध एक जना मात्रै उम्मेदवार दिन सके जितिने पक्षमा पौडेललगायत उनी पक्षका नेता छन्।
कांग्रेसको महाधिवेशन भदौ १६ देखि १९ गतेसम्म छ।
