९ दिनदेखि हराइरहेकी चितवन राप्ती नगरपालिका वडा नम्बर ३ की २२ वर्षीया सुजिता भण्डारीको शव फेला परेकोले उक्त घटनाको गहिरो अनुसन्धान गर्न नेपाली कांग्रेसले माग गरेको छ।
असार ११ गतेदेखि हराइरहेकी भण्डारीको शव आइतबार जंगलमा फेला परेको थियो। उक्त घटनाको गहिरो अनुसन्धान गर्न र दोषीमाथि तत्काल कारबाही गर्न कांग्रेसले माग गरेको छ।
‘पूर्वी चितवनको राप्ती नगरपालिकाकी युवती सुजिता भण्डारीको रहस्यमय ढंगले भएको मृत्युले गम्भीर आशंका जन्माएको छ। ९ दिनसम्म उनी नभेटिनु, कसैको नियन्त्रण र अपहरणमा परेको सूचना उनले दिएपछि पनि खोज अनुसन्धानले परिणाम हासिल नगर्नु र अन्तिममा जंगलमा मृत शरीर भेटिनुले अनेक प्रश्न उब्जिएको छ,’ प्रवक्ता विश्वप्रकाश शर्माले आज निकालेको विज्ञप्तिमा उल्लेख छ।
घटनाहरुको गहिरो अनुसन्धान र कार्वाहीका लागि राज्यको गम्भीर तदारुकता चाहिने कांग्रेसको भनाइ छ।
भण्डारीको शव भेटिएको स्थान नजिकै स्प्राइटको बोत्तल फेला परेको थियो। उक्त बोत्तलमा पतेरालाई मार्न प्रयोग हुने विष फेला परेको छ। भण्डारीले सो विष सेवन गरेको हुन सक्ने प्रहरीको अनुमान छ।
भण्डारीलाई अपहरण गरेको हुन सक्ने परिवारको भनाइ थियो। उनीहरूले प्रहरीमा निवेदन पनि दिएका थिए।
हेर्नुस् विज्ञप्ति:
![](https://www.setopati.com/uploads/editor/hello/congress/208148655_2099008600251687_9122233242944841306_n.jpg)