भूमिसुधार तथा मालपोत कार्यालय कञ्चनपुरका मालपोत अधिकृत लोकराज जोशीबिरुद्ध भ्रष्टाचारको मुद्दा दायर गरिएको छ।
जोशीले जग्गा नामसारी तथा अंशबण्डा गरिदिएवापत सेवाग्राहीसँग अतिरिक्त रकम माग गरी २४ हजार लिइसकेको अवस्थामा अख्तियारले नियन्त्रणमा लिएको थियो।
सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको कार्यालय कञ्चनपुरबाट खटिई गएको टोलीले उनलाई नियन्त्रणमा लिएको हो।
अनुसन्धानको सिलसिलामा जोशीले सेवाग्राहीको नामसारी गर्न बाँकी रहेको जग्गा हाल साविक गरी नामसारी गराईदिने क्रममा उक्त रकम घुस लिएको पुष्टि हुन आएको अख्तियारको ठहर छ।
उक्त कार्य भ्रष्टाचार निवारण ऐन, २०५९ को दफा ३ को उपदफा (१) को कसुर भएको भन्दै जोशीलाई २४ हजार रुपैयाँ बिगो कायम गरी मंगलबार विशेष अदालत, काठमाडौंमा आरोपपत्र दायर गरिएको अख्तियारका प्रवक्ता नारायण प्रसाद रिसालले जानकारी दिए।
